Xitoy poytaxti Pekinda havo harorati keskin sovib ketdi, shaharda odatdagi vaqtdan deyarli bir oy oldin qor yog‘di, deb yozmoqda Reuters.
Yomon ob-havo sharoiti munosabati bilan mamlakatda “to‘q sariq” darajadagi ogohlantirish e’lon qilindi. Milliy meteorologiya markazi Xitoy shimoli-sharqida qor bo‘ronlari yuz berishini prognoz qilmoqda, bir sutkada 45 millimetrgacha qor yog‘ishi kutilmoqda.
Pekinda bu yil birinchi qor odatdagidan 23 kun oldin yog‘di. Pekindan Shanxay va Guanchjougacha bo‘lgan hududda sovuq harorat kuzatilmoqda. 7-noyabr kuni havo harorati Selsiy bo‘yicha 14 darajaga tushib ketdi.
Pekinda yuz minglab odamlar qor bilan qoplangan Taqiqlangan shahar va boshqa sayyohlik maskanlarini ko‘rish uchun ko‘chalarga chiqdi. Xitoy poytaxtida qor bo‘roni tufayli 160 dan ortiq yo‘nalishdagi avtobuslar qatnovi to‘xtatilgan.
Avgust oyida Janubiy Afrika Respublikasining bir qator provinsiyalariga sovuq oqim urilib, kamdan kam uchraydigan kuchli qor yog‘ishi holatini keltirib chiqargandi. Mahalliy aholi, ayniqsa, bolalar ushbu imkoniyatdan foydalanib, Keyptaundan, taxminan, 180 kilometr uzoqlikda joylashgan Sires shahri yaqinida tog‘lar va tog‘ cho‘qqilaridagi qordan bahramand bo‘lgan.
Avvalroq Antarktidada “yashil qor” paydo bo‘lgani, Meksikada koronavirus shaklidagi do‘l yog‘gani, Qozog‘iston va Qirg‘izistonning ayrim hududlarida saratonda kuchli qor yog‘gani haqida xabarlar berilgandi.
O‘zbekistonda ham 8-noyabr kuni Qashqadaryo va Samarqandning ayrim tumanlariga birinchi qor yog‘gani xabar qilindi.
Izoh (0)