Kanadada Alberta provinsiyasining o‘rmon va qishloq xo‘jaligi vaziri Devin Drishen spirtli ichimliklar bilan bog‘liq muammolar tufayli iste’foga chiqdi. Bu haqda uning o‘zi 8-noyabr kuni Facebook’da ma’lum qildi.
“Men Alberta bosh vaziri Jeyson Kenniga iste’foga chiqishim to‘g‘risidagi xatni topshirdim va u qabul qilindi. Alkogolga nisbatan shaxsiy xatti-harakatlarim butun hukumat uchun muammoga aylanganini tan olaman”, — deb yozadi Drishen.
Shuningdek, sobiq vazir ushbu voqeadan chuqur afsusda ekanini bildirgan.
“Biroq iste’foga chiqib, shaxsiy salomatlik va farovonlikka e’tibor qaratish ham o‘zim, ham provinsiya uchun yaxshiroq bo‘ladi degan qarorga keldim”, — deya qo‘shimcha qilgan Drishen.
CBC News anonim manbalarga tayanib Drishen provinsiya parlamentidagi kabinetida kamida o‘n marta spirtli ichimlik ichgani haqida xabar bergandi. Shu bilan birga, uning kabineti eshigi begonalar uchun yopiq bo‘lib, odamlar faqat kod so‘zlarni aytish orqali ichkariga kirishi mumkin bo‘lgan.
Avvalroq Kanada bosh vaziri Jastin Tryudo Vazirlar Mahkamasi tarkibini yangilagan edi. Xususan, Tashqi ishlar vazirligi va Mudofaa vazirligi boshqaruvi ayollarga — mos ravishda Melani Joli va Anita Anandga topshirilgan. Endilikda Tryudo hukumatining yarmini ayollar tashkil qilmoqda.
Izoh (0)