Belarus Telegram kanallarida 8-noyabr kuni Polsha chegarasi tomon harakatlanayotgan qochqinlar karvonini aks ettiruvchi videotasvirlar e’lon qilindi, deb yozadi Meduza.
“Sputnik Belarus” xabariga ko‘ra, muhojirlar Belarusning Grodno viloyatidagi “Bruzgi” chegara punktiga yo‘l olgan. “Varshavskaya rusalka” Telegram kanali karvonda Polsha orqali Germaniyaga o‘tib olishga umid qilayotgan kurd qochqinlari borligini yozdi. “RIA-Novosti” Belarus chegarachilariga tayanib, xabar berishicha, chegara yoniga mingdan ortiq odam ko‘chib kelgan.
Grodno viloyati ichki ishlar boshqarmasida ma’lum qilinishicha, qochoqlar buyumlari bilan Polsha chegarasiga ko‘chib kelgani munosabati bilan politsiya tomonidan huquq-tartibotni ta’minlash choralari ko‘rilmoqda. Belarus Davlat chegara qo‘mitasi muhojirlar kolonnasi Polsha bilan chegara tomon yo‘l olganini tasdiqladi hamda shu sababli Belarus chegarachilari “o‘tkazish punktlarida kuchaytirilgan rejimda xizmat qilayotganini” qo‘shimcha qildi. “Sputnik Belarus”ning xabar berishicha, mamlakat ichki qo‘shinlaridagi harbiy xizmatchilar Belarus chegarasini mustahkamlash uchun yetib kelgan.
Polsha razvedka xizmatlari vazir-koordinatori Stanislav Jarin Twitter’da “trevogaga yetaklovchi ma’lumotlar“ tarqalayotgani haqida yozdi. U chegarani keng miqiyosda kesib o‘tishga urinish uchun tayyorgarlik ko‘rilayotganini qo‘shimcha qildi.
Polsha tashqi ishlar vaziri o‘rinbosari Pyotr Vavjik, o‘z navbatida, “Polsha radiosi” efirida chegarani noqonuniy kesib o‘tishga bo‘lgan har qanday urinishlar darhol to‘xtatilishini aytdi. Vavjik, shuningdek, Belarus hukumatini vaziyatni keskinlashtirishga urinishda aybladi, uning so‘zlariga ko‘ra, bu qurbonlar bo‘lishiga olib kelishi mumkin.
Mavzuga doir:
Izoh (0)