АҚШнинг собиқ президенти Барак Обама Россия ва Хитойни иқлим муаммоларини ҳал этишга етарлича куч сарфламаётганликда айблаб, икки мамлакат етакчиларини Глазгода ўтказилган иқлим бўйича конференцияга келмагани учун танқид қилди, деб хабар беради «РБК».
«Атмосферага чиқариладиган зарарли чиқиндиларнинг энг йирик манбалари ҳисобланувчи Россия ва Хитой етакчилари ҳатто йиғилишларда иштирок этишдан бош тортаётгани алоҳида хавотирга солади, уларнинг мамлакатларини режалари эса (иқлимга салбий таъсирга қарши кураш соҳасида — таҳр.) шошилинч эмасдек кўринмоқда (иқлим масалаларидаги ечимлар — таҳр.)», — дейди Обама.
Шунингдек, у сайёрани қутқариш учун мамлакатлар бирлашиши кераклигини таъкидлаб, Дональд Трамп президентлиги даврида АҚШнинг иқлим бўйича келишувдан чиқиб кетганини танқид қилган.
1—2 ноябрь кунлари БМТ шафелигида ўтказилган иқлим конференцияси доирасида жаҳон етакчилари саммити бўлиб ўтди, бироқ унга Путин ва Си Цзиньпин келмаган. Россия президентининг матбуот котиби Дмитрий Песковнинг тушунтиришича, Путин видеоалоқа орқали муҳокамага қўшилиш имконига эга бўлмагани учун саммитда сўзга чиқмаган. Шу билан бирга, президент конференция учун ўрмон хўжалиги ва ердан фойдаланишни бошқариш бўйича видеомурожаат йўллаган. У Москва саммит иштирокчиларининг декларациясини қўллаб-қувватлашини ва ўрмон ресурсларидан углерод нейтраллиги йўлида фойдаланилишини маълум қилган.
Саммит давомида АҚШ президенти Жо Байден Россия ва Хитой етакчиларининг тадбирга келмаслик тўғрисидаги қарорини хато деб атаган. У Путиннинг «тундраси том маънода ёнаётгани»га эътибор қаратган. Унинг сўзларига кўра, Россия президенти мамлакатда иқлим билан жиддий муаммолар борлиги фонида «бирор чора кўриш ҳақида сукут сақламоқда».
Песков Россияда ўрмонлар ёнаётганини тан олган, бироқ буни кўплаб давлатларда кузатилаётган иқлим ўзгариши дея тушунтирган. Кремль вакилининг таъкидлашича, Калифорнияда ҳам ўрмонлан ёнмоқда. У Москва Глазгодаги саммитнинг моҳиятини тушинишини ва иқлим масалалари бўйича изчил ҳаракат қилишини қўшимча қилган.
COP26 Буюк Британиянинг Глазго шаҳрида 31 октябрда бошланган ва 12 ноябргача давом этади. Унда 200 га яқин давлатдан вакиллар иштирок этиши кутилмоқда. Иқлим бўйича саммит доирасида дастлаб дунёнинг 100 дан ортиқ етакчилари 2030 йилга бориб ўрмонларнинг йўқолиб кетиши жараёнини тўхтатишга келишиб олди.
Эслатиб ўтамиз, иқлим бўйича саммит бошланишидан бир неча кун олдин Глазго шаҳрида кучли ёмғир ёғиб, кўчаларни сув босган эди.
Аввалроқ БМТнинг иқлим саммитида 40 дан ортиқ давлат кўмирдан фойдаланишни камайтириш тўғрисида шартнома имзолагани, Британия бош вазири иқлим ўзгаришига қарши курашда инсоният олдида узоқ йўл турганини айтгани, Зеленский Қрим ва Донбассни «Европа марказидаги экобомбалар» деб атагани тўғрисида хабар берилганди.
Изоҳ (0)