8-noyabr kuni ertalab Nigeriyaning Maradi viloyatida joylashgan maktablarning birida sodir bo‘lgan yong‘in oqibatida kamida 25 bola halok bo‘ldi. O‘quvchilar 5-6 yosh oralig‘ida bo‘lgani aytilmoqda, shuningdek, yana bir necha bola jarohat olgan. Bu haqda Maradi meri Chaybu Abubakarga tayanib, “Korrespondent.net” xabar berdi.
Guvohlardan birining aytishicha, sodir bo‘lgan voqea joyidan jarohat olgan bolalar avtomobillarda shifoxonaga olib ketilgan. Jabrlanganlarning bir nechtasi og‘ir ahvolda ekani aytilmoqda. Maktabdagi barcha darslar bekor qilingan.
BBC nashrining yozishicha, Nigeriyada g‘ishtdan qurilgan maktablar o‘quvchilarga to‘lib ketgani sabab yog‘och va somondan qurilgan sinflar juda ko‘p. Ushbu mamlakatdagi maktablarda yong‘in tez-tez uchrab tursa-da, “kamdan-kam holatda bu qadar ko‘p o‘limga olib keladi”.
Hozircha yong‘in sababi aniq emas, tergov harakatlari davom etmoqda.
Avvalroq Nigeriyada qurolli shaxslarning masjidga qilgan hujumi oqibatida 18 kishi halok bo‘lgani, Nigeriya hukumati mamlakat shimoli-g‘arbida avvalroq jangarilar tomonidan qo‘lga olingan 100 nafar ayol va bolalar ozod etilgani to‘g‘risida xabar berilgandi.
Izoh (0)