O‘zbekiston OTMlarining bakalavriat bosqichi talabalari uchun Prezident va davlat stipendiyalarini tayinlash tartibi tasdiqlandi. Vazirlar Mahkamasi qarori bilan hukumatning bu boradagi ayrim qarorlariga o‘zgartirish va qo‘shimchalar kiritilgan, deb xabar beradi Telegram’dagi “Huquqiy axborot” kanali.
Kiritilgan qo‘shimchalarga ko‘ra, bakalavriat va magistratura talabalari uchun Prezident va davlat stipendiyalarini tayinlash tartibi alohida tasdiqlangan. Prezident stipendiyasi har bir OTM bakalavriat talabalarining 1 nafar bitiruvchi kurs talabasiga tayinlanadi.
Boshqa davlat stipendiyalari oxirgi ikki kursda o‘qiyotgan talabalarga to‘lanadi. Stipendiyalar uchun nomzodlarni ko‘rsatish OTM kengashlari tomonidan talabgorlarning o‘quv va ilmiy faoliyatini ommaviy muhokama qilish asosida amalga oshiriladi.
OTM kengashi qaroriga asosan tanlovlarning navbatdagi bosqichiga tavsiya etilgan nomzodlar “Stipendiya.edu.uz” tizimiga har yili 1—15 avgust kunlari kiritiladi.
Stipendiya tayinlash haqidagi tavsiyanomalarni berish 10—30-sentabr kunlari ko‘rib chiqiladi. Stipendiyalar 1-sentabrdan tayinlanadi.
Eslatib o‘tamiz, 7-sentabr kuni Prezident “Respublika oliy ta’lim muassasalariga talabalikka qabul qilingan iqtidorli yoshlarni yanada qo‘llab-quvvatlash chora-tadbirlari to‘g‘risida”gi qarorni imzolagandi. Qarorga ko‘ra, 2021/2022-o‘quv yilidan boshlab davlat OTMlari bakalavriatining kunduzgi ta’lim shakliga kirish imtihonlarida eng yuqori ball to‘plagan 200 nafar yoshlar uchun Davlat budjeti mablag‘lari hisobidan moliyalashtiriladigan O‘zbekiston Prezidenti granti joriy qilindi.
Izoh (0)