O‘zbekiston Prezidentining tegishli farmonlari bilan Qobul Tursunov Navoiy viloyati hokimi lavozimidan ozod etildi. Bu haqda davlat rahbarining matbuot kotibi Sherzod Asadov xabar berdi.
Ma’lum qilinishicha, 2018-yildan beri Toshkent shahar davlat soliq boshqarmasi boshlig‘i sifatida faoliyat yuritib kelgan Normat Tursunov Navoiy viloyati hokimi vazifasini bajaruvchi etib tayinlangan.
Normat Tursunov soliq organlari tizimidagi faoliyatini 1994-yili Toshkent shahrining Akmal Ikromov (hozirgi Uchtepa) tumani davlat soliq inspektori lavozimidan boshlagan. 2010–2017-yillarda u Jizzax viloyati davlat soliq boshqarmasi raisining birinchi o‘rinbosari, so‘ng Navoiy viloyati davlat soliq boshqarmasi boshlig‘i lavozimlarida ishlagan.
Qobul Tursunov 2016-yil 25-dekabrdan beri Navoiy viloyati hokimi vazifasida ishlab kelayotgandi. Bunga qadar u Oliy Majlis Senatining Budjet va iqtisodiy islohotlar masalalari bo‘yicha qo‘mitasi raisi lavozimida faoliyat yuritgan.
Eslatib o‘tamiz, aprel oyida Prezident Shavkat Mirziyoyev videoselektor yig‘ilishida Qashqadaryo va Navoiy viloyatlari hokimlariga hamda Markaziy bank raisining birinchi o‘rinbosariga hayfsan bergan edi. O‘shanda tadbirkorlarning 7 mingdan ortiq muammosi (24 foiz) yechilmasdan qolayotgani ayilgandi. Ular faoliyatidagi to‘siqlar haqida ma’lum qilgan. Bu viloyatlar orasidagi eng yomon ko‘rsatkich. Davlat rahbari Navoiy viloyatidagi 10 ta kichik sanoat zonalarining 72 gektar yeriga (66 foiz) biror ham loyiha joylashtirilmaganini qayd etgandi. Prezident “chorak yakunigacha o‘zgarish bo‘lmasa, barchasi ishdan ketadi”, deya ogohlantirgan edi.
Avvalroq Prezident huzuridagi Davlat xizmatini rivojlantirish agentligi O‘zbekistonning barcha tuman, (shahar)larida hokim va hokim o‘rinbosarlari faoliyatining baholash reytingini e’lon qilgandi. Unda viloyatlarning top tumanlari reytingida Navoiy viloyati yetakchilik qilgan.
Izoh (0)