Qashqadaryo viloyati hokimi Zoir Mirzayev yurak porogi bilan tug‘ilgan bolaning davolanishi uchun 25 million so‘m mablag‘ ajratdi. Bu haqda “Daryo”ga viloyat hokimligi axborot xizmati rahbari Ahror Sodiqov ma’lum qildi.
Ahror Sodiqovning ma’lum qilishicha, bolaning davolanishi uchun yig‘ilgan mablag‘ onasining soddaligi sabab firibgarlar tomonidan o‘zlashtirilgan. Bundan xabar topgan Zoir Mirzayev esa bolaning onasi bilan bog‘lanib, undan qanday yordami tegishi mumkinligini so‘ragan va u 25 million so‘m mablag‘ga muhtojligini bilib, ko‘mak bergan.
“Chiroqchilik Nurbek ismli bola 2018-yil yurak porogi bilan tug‘ilgan, keyinchalik oqqon kasalligi bilan ham og‘rigan. Onaizorning aytishicha, o‘g‘li doimiy ravishda shifokorlar ko‘rigidan o‘tib turishi uchun er-xotin besh oydan beri Toshkent shahrida ijarada yashab keladi. Nurbekning otasi kunlik ishga chiqadi, onasi esa har daqiqada bolaning oldida bo‘lishi kerak. Bu haqda xabar topgan viloyat rahbari oilaga ko‘mak berdi”, — deydi hokimning matbuot kotibi.
Avvalroq Qashqadaryo hokimi 6 nafar yetim bolaga onalik qilayotgan kosonlik ayolga 30 million so‘m moddiy yordam ko‘rsatilishini ma’lum qilgandi.
Izoh (0)