Qashqadaryo viloyati Yakkabog‘ tumani hokimi Lutfiddin Abdullayevning xizmat avtomobili yo‘l-transport hodisasiga uchradi. Bu haqda “Daryo” manbasi xabar berdi.
Qayd etilishicha, yo‘l-transport hodisasi 2021-yilning 7-noyabr kuni kechki vaqtda sodir bo‘lgan.
“YTH tuman markazidagi ‘Al-Kamol’ savdo markazi ro‘parasida sodir bo‘lgan. Mashinada hokim bo‘lmagan. Haydovchi tez harakatlanib kelgan va boshqaruvni yo‘qotgan. Mashina daraxtga ‘osilib qolgan’”, — deydi voqea guvohi.
“Daryo” muxbiri mazkur voqeaga aniqlik kiritish maqsadida tuman hokimligi axborot xizmati rahbari Sherzod Hasanov bilan bog‘landi. “Mazkur voqeadan xabarim yo‘q. Tez orada surishtirib batafsil ma’lumot beraman”, — degan hokimning matbuot kotibi Sherzod Hasanov.
Eslatib o‘tamiz, avariyaga uchragan 311 million so‘mlik Captiva xarid qilinishidan avval ko‘plab mojarolarga sabab bo‘lgandi. Xalq deputatlari tuman Kengashi sessiyasida ko‘rib chiqilgan mazkur xarid masalasi 25 nafar deputatning 24 nafari tomonidan qo‘llab-quvvatlangan bo‘lsa, bir nafar deputat mazkur mashinaning sotib olinishiga qarshi chiqib, 311 million so‘m pulni muhtojlarga sarf qilish takflini bergandi.
Ma’lumot uchun, Yakkabog‘ hokimi xizmat avtomobilining YTHga uchrashi Qashqadaryodagi hokimlar xizmat avtomobilining avariyaga uchrashi bilan bog‘liq yagona holat emas. Koson tumani hokimi Asrol Boyqarayevning xizmat avtomobili ham 2020-yilning 12-dekabr kuni YTHga uchrab, 60 yoshli fuqaroning o‘limiga sabab bo‘lgandi.
Izoh (0)