Janubiy Koreya Bandlik va mehnat vazirligi rasmiy bayonotiga ko‘ra, 2021-yilning noyabr oyi oxirida ishchi kuchini jo‘natuvchi barcha davlatlar, shu jumladan, O‘zbekistondan E-9 ishchi vizasi bilan mehnat migrantlarini qabul qilish jarayoni tiklanishi rejalashtirilgan. Bu haqda Tashqi mehnat migratsiyasi agentligi ma’lum qildi.
Buning uchun fuqarolardan:
- Janubiy Koreyada tan olingan vaksinalar (AstraZeneca, Moderna, Pfizer, Sinovac, Sinopharm, Janssen)dan biri bilan Koreyaga kirib borishdan kamida 14 kun oldin to‘liq emlangan bo‘lishi;
- Janubiy Koreyaning O‘zbekistondagi elchixonasi tomonidan tan olingan laboratoriyalar (Korea No 1 Laboratory, SWISS LAB, De Factum Laboratoriyes, Intermed Innovation) dan birida Koreyaga kirib borishdan oldin 72 soat ichida PZR test topshirgan va test natijasi manfiy bo‘lishi talab etiladi.
Janubiy Koreya Inson resurslarini rivojlantirish xizmatining ma’lum qilishicha, O‘zbekistondan mehnat migrantlarining E-9 ishchi vizasi bilan kirib borish tartibi va soni bo‘yicha ma’lumot Koreyaning O‘zbekistondagi EPS markazi orqali qo‘shimcha yetkaziladi.
Eslatib o‘tamiz, 2020-yildagi epidemiologik vaziyatdan kelib chiqib mehnat ta’tili olib kelgan va shartnoma loyihasini olgan fuqarolarning Janubiy Koreyaga mehnat faoliyatini amalga oshirish uchun ketish imkoniyati cheklangan edi. 2021-yilning fevral oyi boshlarida Janubiy Koreya O‘zbekistonni koronavirus bo‘yicha xavfli davlatlar ro‘yxatidan chiqargandi.
Bundan avval Rossiyada ishlash huquqini beruvchi patent uchun tibbiy ko‘rik O‘zbekistonda o‘tkazilishi hamda O‘zbekistonda mehnat migratsiyasida talab yuqori bo‘lgan kasblar to‘g‘risida yagona ma’lumotlar bazasi yaratilishi haqida xabar berilgandi.
Izoh (0)