5- noyabr kuni AOKAda turizm va sport vazirining birinchi o‘rinbosari Ulug‘bek A’zamov, boshqarma boshlig‘i Ibrohim Barnoyev, vazirlik axborot xizmati rahbari Lola Rahmonboyeva ishtirokida matbuot anjumani o‘tkazildi.
Anjumanda xabar berilishicha, 2021-yilning 9 oyi davomida mahalliy hokimliklar va vazirlik, idora, tashkilotlar bilan hamkorlikda 3 million 700 ming nafardan ortiq o‘zbekistonliklarning sayohatlari tizimli amalga oshirildi.
Turizm sohasini tiklash uchun olib borilgan amaliy ishlar natijasida 2021-yilning 9 oyi davomida O‘zbekistonga 1 million 200 ming (1 135 621) nafarga yaqin xorijiy sayyoh tashrif buyurdi va 273 million dollar miqdorida turizm xizmatlari eksport qilindi.
Tahlillarga ko‘ra, 2021-yilda ayrim G‘arbiy Yevropa, Amerika va MDH davlatlaridan kutilganidan ko‘proq sayyohlar tashrif buyurmoqda. Yaponiya, Xitoy, Hindiston va Janubi-sharqiy Osiyo (Indoneziya, Malayziya, Singapur, Tailand, Tayvan, Janubiy Koreya) davlatlardagi cheklovlar sababli prognoz qilingan ko‘rsatkichlardan kam miqdorda sayyoh kelgan.
Yil davomida mazkur toifadagi sayyohlar sonini 1 million 700 ming nafarga yetkazish prognoz qilingan. Qayd etilishicha emlash jarayoni yo‘lga qo‘yilganidan keyin xalqaro turizm jonlandi.
2021-yilning yanvar–mart oylarida o‘rtacha har oyda 85 ming nafar xorijiy fuqarolari sayyoh sifatida O‘zbekistonga kirib kelgan bo‘lsa, bu ko‘rsatkich avgust va sentabr oylarida deyarli 190 mingga yetgan.
Bundan avval Shahrisabz, Marg‘ilon va Xivada Madaniy meros texnikumlari tashkil etilishi, Toshkent viloyatida turistik zonalarni barpo etishga 1 mlrd dollar investitsiya jalb etilishi hamda O‘zbekistonda mehmonxonalar soni qanchaga yetgani ma’lum qilingani haqida xabar berilgandi.
Izoh (0)