DXX Surxondaryo viloyati boshqarmasi va IIB bilan hamkorlikda viloyatning Termiz shahri va Termiz tumanida yashovchi, xalqaro terrorchilik guruhlar faoliyatini qo‘llab-quvvatlab kelgan shaxslar faoliyatiga chek qo‘ydi.
Viloyat IIB xabariga ko‘ra, ushbu shaxslarning aksariyati Termiz shahridagi bozorlardan birida savdo faoliyati bilan shug‘ullanib kelgan. Ular Telegram’da virtual guruh tashkil qilgan holda unda terrorchilik tashkilotlari g‘oyalarini targ‘ib qilgan. O‘zlarining Turkiya, Suriya va Misrdagi g‘oyadoshlarini moliyaviy tomondan qo‘llab-quvvatlash maqsadida, plastik karta rasmiylashtirgan hamda unda yig‘ilgan pul mablag‘larini ko‘rsatilgan hududlarga yuborish bilan shug‘ullangan.
Qo‘lga olinganlar orasida kelgusida Suriyaga borib, jangarilar safiga qo‘shilishni rejalashtirgan fuqarolar ham mavjud.
Guruh a’zolarining xonadonlarida o‘tkazilgan tintuv jarayonida ekstremistik va terrorchilik mazmunidagi ashyoviy dalillar protsessual tartibda rasmiylashtirib olingan.
Xabarda aytilishicha, hozirda qo‘lga olingan shaxslarga nisbatan Jinoyat kodeksining tegishli moddalari bo‘yicha jinoyat ishi qo‘zg‘atilib, tergov harakatlari olib borilmoqda.
Izoh (0)