AQShdan Qoraqalpog‘istonga gumanitar yordam sifatida 3 million dollarlik tibbiyot buyumlari va jihozlari, sun’iy nafas oldirish moslamalarini o‘z ichiga olgan 40 futlik o‘nta konteyner yuborildi. Mazkur gumanitar yuk Project C.U.R.E. va Boeing bilan hamkorlikda amalga oshirildi, deb xabar beradi “Dunyo” agentligi.

Foto: “Dunyo” agentligi

Ma’lum qilinishicha, Vashington shtatining Sietl shahrida gumanitar yordamni yuborish marosimida O‘zbekistonning AQShdagi elchisi Javlon Vahobov va Boeing kompaniyasi vitse-prezidenti Monta Freyzer, Project C.U.R.E. nodavlat tashkiloti prezidenti Duglas Jekson hamda ushbu NNTning xorijiy hukumatlar bilan ishlash bo‘yicha direktori Melisa Esposti ishtirok etgan.

Gumanitar yuk bo‘yicha kelishuvlar 2019-yilda elchixona rahbari va Project C.U.R.E. prezidenti Duglas Jekson bilan tashkilotning Vest-Gruve (Pensilvaniya) va Hyuston (Texas) shaharlaridagi omborlariga tashrif chog‘ida erishilgan.

Ta’kidlanishicha, Qoraqalpog‘iston sog‘liqni saqlash vazirligi so‘roviga binoan Project C.U.R.E. tomonidan Sietlda shakllantirilgan gumanitar yukning birinchi jo‘natmasi qariyb 6 tonnaga teng. Ushbu yukni Kanzas-sitidan Sietlga (3 ming kilometr) Pensilvaniya shtatidagi o‘zbeklar diasporasi faollaridan biri, logistika kompaniyasi asoschisi Ahmadjon Odilov amalga oshirgan.

Shuningdek, AQShdagi o‘zbekistonliklar tomonidan asos solingan Give to Get International xayriya tashkiloti ko‘magida mustaqil ekspertlarning Qoraqalpog‘istondagi tibbiyot muassasalarining ehtiyojlarini baholash bo‘yicha xarajatlari to‘langan.

Boeing vitse-prezidenti Monta Freyzer o‘z so‘zida kompaniya rahbariyati so‘nggi 25 yil ichida Uzbekistan Airways bilan yaqin hamkorlik o‘rnatgani va O‘zbekistonning aviatsiya sohasini rivojlantirishdagi yutuqlarini yuqori baholashini ta’kidlab o‘tgan.

“Biz Qoraqalpog‘istonga gumanitar yukning birinchi partiyasini Dreamliner samolyotida yuborish tadbirida ishtirok etayotganimizdan juda xursandmiz. Ayniqsa, koronavirus pandemiyasi bilan bog‘liq bugungi sinovli vaqtda ushbu xayriya tadbiriga ulush qo‘shayotganimizdan mamnunmiz”, — deydi Monta Freyzer.

Monta Freyzer Boeing’ning O‘zbekiston bilan strategik hamkorlikni davom ettirish maqsadida Project C.U.R.E. loyihasiga 100 ming dollar miqdoridagi chek topshirgan. Ushbu mablag‘ Orolbo‘yi aholisi uchun navbatdagi gumanitar yordamni yetkazishni moliyalashtirish uchun ishlatilishi qayd etildi.

Gumanitar yordam Sietldan Toshkentga Uzbekistan Airways uchun Boeing zavodida ishlab chiqarilgan yettita so‘nggi yangi Dreamliner samolyotidan biri orqali yetkazib beriladi. “5-may kuni esa beg‘araz ko‘mak Toshkentdan Nukus shahriga yetkaziladi. Tibbiy jihozlar bilan ta’minlangan navbatdagi to‘rtta konteynerdagi insonparvarlik yuki yoz fasli oxiriga qadar Orolbo‘yi mintaqasiga yuboriladi”, — deyiladi xabarda.

Eslatib o‘tamiz, Prezident Shavkat Mirziyoyev BMT Bosh Assambleyasining 75-sessiyasidagi nutqida Orolbo‘yi mintaqasini ekologik innovatsiya va texnologiyalar hududi deb e’lon qilish haqida BMT rezolyutsiyasini qabul qilishni taklif etgandi.