O‘zbekiston TIV Ozarbayjonga bormoqchi bo‘lgan fuqarolarga ogohlantirish bilan chiqdi

Ozarbayjon Vazirlar Mahkamasi huzuridagi Tezkor shtab qarori bilan ushbu mamlakatdagi maxsus karantin rejimi 2022-yil 1-yanvarga qadar uzaytirildi. Bu haqda O‘zbekistonning Boku shahridagi elchixonasiga tayanib, TIV matbuot xizmati xabar berdi.

Amaldagi qoidalarga ko‘ra, hozirgi vaqtda O‘zbekiston fuqarolari Ozarbayjon hududiga kirishi uchun pasport turidan (xorijiy, diplomatik) qat’i nazar, o‘zlari bilan birga quyidagilarni olishlari kerak:

• Ozarbayjon Vazirlar Mahkamasi huzuridagi tezkor shtabning maxsus ruxsatnomasi. Ushbu ruxsatnomani rasmiylashtirish to‘g‘risidagi so‘rov belgilangan tartibda qabul qiluvchi tomon tarafidan oldindan, ya’ni Ozarbayjonga jo‘nab ketishdan 14 ish kunidan kam bo‘lmagan muddatda Tezkor shtabga jo‘natilishi zarur. Shu bilan birga, arizaning mavjudligi ruxsat olishni kafolatlamaydi hamda ruxsatnomaning berilishi – Ozarbayjonga kirib kelayotgan O‘zbekiston fuqarosi to‘g‘risidagi ma’lumotlarning Davlat chegara xizmatining tegishli ro‘yxatlarga o‘z vaqtida kiritilishni ta’minlanmasligi mumkin;
• Ozarbayjonga jo‘nashdan oldin so‘nggi 72 soat mobaynida olingan COVID-19 aniqlash uchun PZR-testinig salbiy javobi to‘g‘risidagi tibbiy ma’lumotnoma. Chegaradagi bo‘lishi mumkun bo‘lgan ortiqcha tekshiruvlardan va aeroportda rasmiyatchiliklardan aylanib o‘tish imkonini beruvchi QR-kod bo‘lishi ma’qul (QR-kodi mavjud bo‘lmagan ma’lumotnomalar egalari Boku shahrining aeroportida batafsil tekshiruvdan o‘tadi);
• COVID-19 pasportlarining turlaridan biri: “COVID-19 ga qarshi vaksinatsiyadan o‘tganlik to‘g‘risidagi guvohnoma” (fuqaro koronavirus infeksiyasiga qarshi vaksinaning kamida ikki dozasini olgandan keyin O‘zbekistonning vakolatli tibbiyot organi tomonidan beriladigan hujjat) yoki “COVID-19 immuniteti guvohnomasi” (fuqaroda koronavirus infeksiyasi bilan kasallanganligi va uning qonida antitanalar mavjudligi to‘g‘risida O‘zbekistonning vakolatli tibbiyot organi tomonidan beriladigan hujjat. Ushbu hujjat Ozarbayjonga kirishdan kamida 6 oy oldin berilgan bo‘lishi kerak).

Avvalroq Germaniya va Gretsiya koronavirusga qarshi emlanmaganlar uchun cheklovlarni kuchaytirgani, O‘zbekistonning Hindistondagi elchixonasida sayyohlik vizasi berish qayta tiklangani to‘g‘risida xabar berilgandi.