Тошкент шаҳрида Ўзбекистон Инвестициялар ва ташқи савдо вазирлиги томонидан Европа Иттифоқининг мамлакатдаги делегацияси билан биргаликда ривожланиш соҳасида ҳамкорлик масалалари бўйича Ўзбекистон—Европа Иттифоқи кичик қўмитасининг ташкил этилган 4-йиғилиши бўлиб ўтди, деб хабар беради «Дунё» агентлиги.
Инвестициялар ва ташқи савдо вазирлиги маълумотига кўра, Европа комиссияси делегацияси ҳамда Европа Иттифоқига аъзо давлатларнинг Ўзбекистондаги элчихоналари, шунингдек, алоқадор вазирлик ва идоралар вакиллари иштирокида бўлиб ўтган тадбирга инвестициялар ва ташқи савдо вазирининг ўринбосари Шуҳрат Вафоев ва Европа комиссияси департаменти бошлиғи Сара Риналди ҳамраислик қилган.
Учрашув кун тартибидаги асосий масалалар 2021–2027 йилларга мўлжалланган янги дастур доирасида Европа комиссияси билан икки томонлама молиявий-техникавий ҳамкорлик истиқболлари ва йўналишларидан иборат бўлган.
Хусусан, қишлоқ хўжалигини қўллаб-қувватлаш ва «яшил ўсиш», суд ҳамда транспорт-логистика тизимларининг бошқарув самарадорлигини ошириш ва рақамлаштириш, инвестициявий муҳитни юксалтириш, шунингдек, Оролбўйи минтақасини ижтимоий-иқтисодий ривожлантириш йўналишларида лойиҳа ва тадбирларни амалга ошириш масалаларига тўхталиб ўтилди, дейилади хабарда.
Европа томони Европа комиссиясининг 2021–2024 йилларда Ўзбекистонга 83 миллион евро миқдорида мақсадли грантлар ажратиш, шунингдек, Оролбўйи минтақасини ривожлантириш мақсадида Теаm Europe ташаббуси доирасида Европа Иттифоқига аъзо давлатлар билан биргаликда молиявий ва техник ҳамкорликни кенгайтириш ниятида эканини маълум қилган.
Музокаралар якунида Европа комиссиясининг 2021–2027 йилларга мўлжалланган янги дастури доирасида қўшма ташаббусларни жадаллаштириш ва муваффақиятли амалга ошириш мақсадида яқиндан ҳамкорлик қилишга келишилган.
Аввалроқ АҚШдан Оролбўйи аҳолиси учун гуманитар ёрдам юборилгани, Жанубий Корея Оролбўйи минтақаси бўйича траст фондининг молиявий донорига айлангани тўғрисида хабар берилганди.
Изоҳ (0)