DXX Samarqand viloyat boshqarmasi hamda IIB xodimlari bilan hamkorlikda 29-oktabr kuni Samarqand viloyati Urgut tumanida yashovchi 5 nafar “Hizb ut-Tahrir” diniy ekstremistik tashkiloti a’zolarining jinoiy faoliyatiga chek qo‘ydi. Bu haqida “Daryo”ga DXX Samarqand viloyat boshqarmasi ma’lum qildi.
Mazkur ekstremistik guruh yetakchisi 1993-yilda tug‘ilgan, Urgut tumanida yashovchi Ya.J. Telegram orqali “Hizb ut-Tahrir” diniy ekstremistik tashkilotining g‘oyaviy rahnamosi — 1980-yilda tug‘ilgan Qirg‘iziston fuqarosi, M.Xaldarov (laqabi Mahmud Abdulmo‘min) bilan bog‘lanib turgan hamda uning ko‘rsatmasiga muvofiq, “virtual halqa” tashkil etgan.
Qolgan 4 nafar jinoiy sheriklari bilan birga, Mahmud Abdulmo‘minning ekstremistik mazmundagi video, audioroliklarini muntazam ravishda kuzatib borib, ularni yaqinlari orasida tarqatib kelgan.
Hozirda tergovga qadar tekshiruv tadbirlari olib borilmoqda.
Eslatib o‘tamiz, 2021-yilning iyun oyida ham Samarqand viloyati Urgut tumanida faoliyat yuritayotgan 6 nafardan iborat “Hizb ut-Tahrir” terroristik tashkiloti a’zolarining g‘ayriqonuniy faoliyatiga chek qo‘yilgandi. Shuningdek, Suriya va Yaqin Sharqdagi terroristik tashkilotlar jangarilari ta’siriga tushib, ular safiga borib qo‘shilishni rejalashtirgan Samarqand shahridagi 14 nafar shaxsdan iborat guruh ushlangandi.
Iyul oyida esa viloyatning Ishtixon tumanida Suriyada jangovar harakatlarda ishtirok etish uchun ketayotgan bir guruh shaxslar qo‘lga olingandi.
Izoh (0)