Самарқандда «Ҳизб ут-Таҳрир»га аъзо 5 киши қўлга олинди

ДХХ Самарқанд вилоят бошқармаси ҳамда ИИБ ходимлари билан ҳамкорликда 29 октябрь куни Самарқанд вилояти Ургут туманида яшовчи 5 нафар «Ҳизб ут-Таҳрир» диний экстремистик ташкилоти аъзоларининг жиноий фаолиятига чек қўйди. Бу ҳақида «Дарё»га ДХХ Самарқанд вилоят бошқармаси маълум қилди.

Мазкур экстремистик гуруҳ етакчиси 1993 йилда туғилган, Ургут туманида яшовчи Я.Ж. Telegram орқали «Ҳизб ут-Таҳрир» диний экстремистик ташкилотининг ғоявий раҳнамоси — 1980 йилда туғилган Қирғизистон фуқароси, М.Халдаров (лақаби Маҳмуд Абдулмўмин) билан боғланиб турган ҳамда унинг кўрсатмасига мувофиқ, «виртуал ҳалқа» ташкил этган.

Қолган 4 нафар жиноий шериклари билан бирга, Маҳмуд Абдулмўминнинг экстремистик мазмундаги видео, аудиороликларини мунтазам равишда кузатиб бориб, уларни яқинлари орасида тарқатиб келган.

Ҳозирда терговга қадар текширув тадбирлари олиб борилмоқда.

Эслатиб ўтамиз, 2021 йилнинг июнь ойида ҳам Самарқанд вилояти Ургут туманида фаолият юритаётган 6 нафардан иборат «Ҳизб ут-Таҳрир» террористик ташкилоти аъзоларининг ғайриқонуний фаолиятига чек қўйилганди. Шунингдек, Сурия ва Яқин Шарқдаги террористик ташкилотлар жангарилари таъсирига тушиб, улар сафига бориб қўшилишни режалаштирган Самарқанд шаҳридаги 14 нафар шахсдан иборат гуруҳ ушланганди.

Июль ойида эса вилоятнинг Иштихон туманида Сурияда жанговар ҳаракатларда иштирок этиш учун кетаётган бир гуруҳ шахслар қўлга олинганди.