O‘zbekistonda 215 ming nafardan ortiq bola Pfizer/BioNTech vaksinasi bilan ixtiyoriy ravishda emlandi. Bu haqda Sog‘liqni saqlash vazirligi matbuot kotibi xabar qildi.
Eslatib o‘tamiz, 2021-yilning 28-sentabridan O‘zbekiston bosh davlat sanitariya vrachi va milliy texnik immunologik ekspert komissiyasining qaroriga asosan, mamlakatda ota-onalar va vasiylarining roziligi asosida, ixtiyoriy ravishda 12 yoshdan katta bolalarni Pfizer vaksinasi bilan emlash yo‘lga qo‘yilgan.
2-noyabr holatiga ko‘ra, mamlakatda 215 106 nafar 12 yoshdan 18 yoshgacha bo‘lgan bolalar Pfizer vaksinasi bilan ixtiyoriy ravishda emlangan.
Xususan, bolalarni koronavirusga qarshi emlash jarayoni Namangan (56 600 doza), Farg‘ona (40 406 doza), Andijon (22 502 doza) viloyatlarida yuqori sur’atlarda olib borilmoqda.
Ma’lumot uchun, mamlakatda aholini koronavirusga qarshi emlash tadbirlari 1-apreldan boshlandi. Emlash ixtiyoriy va bepul, vaksina olishdan bosh tortganlarga hech qanday chora ko‘rilmaydi. Iyun oxiridan boshlab esa Toshkentda 18 yoshdan oshganlar koronavirusga qarshi ommaviy emlash boshlangandi.
Izoh (0)