Samarqand viloyati hokimi Erkinjon Turdimov 3 nafar hokim va 20 nafar hokim o‘rinbosariga qat’iy ogohlantirish hamda hayfsan intizomiy jazo choralarini qo‘lladi. Bu haqda viloyat hokimligi axborot xizmati “Daryo”ga ma’lum qildi.
Prezident huzuridagi Davlat xizmatini rivojlantirish agentligi barcha viloyat, tuman va shaharlardagi hokim va hokim o‘rinbosarlari faoliyatini eng muhim samaradorlik ko‘rsatkichlari (EMSK, KPI) asosida baholash tizimini yo‘lga qo‘ygani to‘g‘risida xabar berilgandi.
Agentlikning “Argos.uz” portalidagi “Reyting” sahifasida 2021-yil iyun holatiga (2-chorak bo‘yicha) natijadorligi yuqori hududlar, hududlarda ko‘rsatkichlari eng yuqori tuman (shahar)lar, hududlarda ko‘rsatkichlari eng quyi tuman (shahar)lar, hokim o‘rinbosarlarining EMSK bo‘yicha reytingi, tuman (shahar) hokimlarining top-20 taligi, tuman (shahar) hokimlarining quyi 20 taligi bo‘yicha reyting e’lon qilingan.
Reyting natijalariga ko‘ra, eng yuqori ko‘rsatkichli viloyatlar reytingida Navoiy viloyati (87 ball) yetakchilik qilmoqda. Viloyatlar orasida eng past ko‘rsatkich Surxondaryoda (66 ball) qayd etilgan.
Shuningdek, Samarqand viloyatidagi Past Darg‘om, Kattaqo‘rg‘on, Urgut tumanlari va Samarqand shahri reytingda eng past natijalarni ko‘rsatgan. Jumladan, tumanlar orasida Past Darg‘om tumani viloyatda 16-o‘rin, respublikada 192-o‘rin, Kattaqo‘rg‘on tumani viloyatda 15-o‘rinda, respublikada 185-o‘rinda, Urgut tumani viloyatda 14-o‘rinda, respublikada 183-o‘rinda, Samarqand shahri viloyatda 13-o‘rinda, respublikada 177-o‘rinda qayd etilgan (respublika bo‘yicha umumiy ro‘yxatda 205 ta hudud bor).
2-noyabr kuni viloyat hokimi boshchiligida o‘tkazilgan videoselektor yig‘ilishida reytingda past ko‘rsatkich qayd etgan shahar va tuman hokimlari va ularning o‘rinbosarlaridan hisobot so‘ralgan.
Yig‘ilish yakunida reytingda past ko‘rsatkich qayd etgan 3 nafar hokim va 20 nafar hokim o‘rinbosariga qat’iy ogohlantirish va hayfsan intizomiy jazosi qo‘llanishi belgilangan.
Eslatib o‘tamiz, Prezident Shavkat Mirziyoyev hokimlar lavozimini saylanadigan qilish taklifi bilan birinchi marta 2016-yil dekabrida chiqqandi. 2017-yil avgustida u hokimlarni xalq tomonidan saylash tizimini “hoziroq” joriy etishga tayyorligini bildirgan.2020-yilning sentabr oyida davlat rahbari O‘zbekiston hokimlarni saylash tizimiga o‘tishini yana bir bor ta’kidlagan. Shu bilan birga, rivojlanish darajasi “qoniqarsiz” hamda “o‘rta” deb baholangan tuman va shaharlarda inqirozga qarshi boshqaruv tizimi joriy etilishi ma’lum qilingan. Ya’ni, ularga rahbarlik qilish istagini bildirgan har qanday talabgor hududni rivojlantirish dasturini mahalliy kengashlarda himoya qilishi mumkin. Xalq vakillarini ishontira olgan salohiyatli kishilar butun jamoasi bilan tumanga rahbar etib tayinlanadi.
Izoh (0)