Rossiyada mamlakat hududiga migrantlarni noqonuniy olib kirish bilan shug‘ullangan ikki nafar O‘zbekiston fuqarosi qo‘lga olindi. Bu haqda Rossiya IIV axborot xizmati xabar berdi.
Ma’lum bo‘lishicha, ular Moskva shahridagi xususiy klinikalar xodimlari bilan til biriktirib, davolanish uchun soxta taklifnomalar orqali Markaziy Osiyo fuqarolarini Rossiyaga olib kirish bilan shug‘ullangan.
“Aeroportlar orqali chegarani kesib o‘tishda migrantlar mansabdor shaxslarga ushbu soxta hujjatlarni taqdim etgan va mamlakat hududiga kirib kelgan”, — deydi IIV rasmiy vakili Irina Volk.
Bundan tashqari, chegara nazorati xodimlari taklifnomalar haqiqiyligini tekshiruvdan o‘tkazganida tibbiyot klinikasi xodimlari xorij fuqarolarida kasallik borligi bo‘yicha yolg‘on ma’lumotlar bergan. Aslida esa fuqarolar davolanish emas, balki ishlash maqsadida kelgan.
Mazkur holat bo‘yicha Rossiya Jinoyat kodeksining 322-1-moddasi (noqonuniy migratsiyani tashkil etish) bilan jinoyat ishi qo‘zg‘atilgan.
“Tezkor-qidiruv tadbirlari natijasida huquq-tartibot organlari xodimlari to‘rt nafar gumonlanuvchini qo‘lga oldi. Gumonlanuvchilarning ikki nafari qonunbuzarlik harakatlarining tashkilotchiligida gumonlangan va ayni vaqtda hibsda. Qo‘lga olingan yana ikki nafar fuqaro xususiy tibbiy tashkilot xodimlari bo‘lib, aybiga to‘liq iqror bo‘lgan va tergov bilan hamkorlik qilmoqda”, — deya qo‘shimcha qiladi Irina Volk.
Avvalroq Moskva hukumati qurilishlarda migrantlardan butunlay voz kechishni ta’minlaydigan rejani tayyorlashi, O‘zbekiston fuqarolari Rossiyaga kirgan kundan boshlab 15 kun ichida ro‘yxatdan o‘tish zaruratidan ozod etilishi mumkinligi to‘g‘risida xabar berilgandi.
Izoh (0)