Mujibillo Tursunov chorak finalda amaldagi jahon chempioniga yengilib, Belgrad—2021 dagi yurishini to‘xtatdi

Belgrad shahri mezbonligida o‘tayotgan boks bo‘yicha Jahon chempionatining 2-noyabr kungi bahslari bo‘lib o‘tmoqda.

-63,5 vazn toifasida O‘zbekiston sharafini himoya qilayotgan Mujibillo Tursunov kubalik Endi Kruzga qarshi ringga ko‘tarildi. Uch raund yakunlariga ko‘ra kubalik bokschi 3:2 hisobida Tursunovdan ustun keldi. Shu tariqa Mujibillo ham musobaqa bilan xayrlashdi. Qayd etish kerak, Endi Kruz amaldagi jahon va Olimpiada chempioni hisoblanadi.

Tursunov bundan avvalgi bosqichlarda yaponiyalik Tayga Imanaga va Xitoy Taypeyi vakili Chu Yen Lai ustidan g‘alaba qozongandi.

2-noyabr kungi janglarni Madiyor Saidrahimov yakunlab beradi. Uning ishtirokidagi jang Toshkent vaqti bilan 00:40 dan so‘ng boshlanadi.

Avvalroq Hasanboy Do‘stmatov, Shohjahon Abdullayev, Mirazizbek Mirzaxalilov, Shahram G‘iyosov, Shahobiddin Zoirov, Asadxo‘ja Mo‘ydinxo‘jayev, Odiljon Aslonov, Nodirjon Mirzahmedov, Saidjamshid Ja’farov va Lazizbek Mullajonov kabi o‘zbekistonlik bokschilar Jahon chempionatini tark etgandi.