Dunyo va o‘zbek sportiga oid 2-noyabr kunining eng muhim xabarlari dayjesti bilan tanishing.
O‘zbekiston
O‘zbekiston U-21 terma jamoasi Osiyo Kubogi saralashini g‘alaba bilan yakunladi
O‘zbekiston U-21 terma jamoasi U-23 Osiyo Kubogi—2022 saralash bosqichining so‘nggi o‘yinida Kuvayt U-23 ni 5:1 hisobida mag‘lubiyatga uchratdi va guruhda birinchi o‘rinni egalladi.
Eslatib o‘tamiz, Osiyo Kubogi—2022 musobaqasi O‘zbekistonda bo‘lib o‘tadi. Shu sabab Temur Kapadze jamoasining ushbu saralash bosqichidagi natijasi O‘zbekistonning Osiyo Kubogidagi ishtirokiga ta’sir qilmaydi.
Jahon chempionati bilan xayrlashgan o‘zbekistonlik bokschilar soni 10 nafarga yetdi
Serbiyaning Belgrad shahrida boks bo‘yicha Jahon chempionatining 2-noyabr kungi bahslari o‘tkazilmoqda.
Nodirjon Mirzahmedov qozog‘istonlik Temirtas Jussupovga yengilib, musobaqa bilan xayrlashdi. Saidjamshid esa Ja’farov tailandlik raqibiga imkoniyatni boy berib, JChni tark etdi. Shuningdek, O‘zbekiston terma jamoasining musobaqadagi bayroqdori Lazizjon Mullajonov ham mundialdagi ishtirokini yakunladi, u armanistonlik raqibiga yengildi.
Shu tariqa JCh—2021 ni tark etgan o‘zbekistonlik bokschilar soni 10 nafarga yetdi. Hozirda faqat yarim finalga yo‘l olgan Abdumalik Halokovda medalni qo‘l kiritish imkoniyati bor.
2-noyabr kuni yana ikki nafar o‘zbekistonlik bokschi o‘z jangini o‘tkazadi.
- -63,5 kg: Mujibillo Tursunov — Endi Kruz (Kuba) – 22:55 dan keyin;
- -92 kg: Madiyor Saidrahimov — Lyuis Uilyams (Angliya) – 00:40 dan so‘ng.
Jahon
Antonio Konte — “Tottenhem” bosh murabbiyi
Antonio Konte rasman “Tottenhem”ning yangi bosh murabbiyi etib tayinlandi.
London klubi italiyalik mutaxassis bilan 2023-yilga qadar mo‘ljallangan shartnoma imzolagan. Shuningdek, shartnomada kelishuvni uzaytirish sharti ham ko‘zda tutilgan.
Konte ushbu lavozimda Nunu Eshpiritu Santuning o‘rnini egallaydi. Avvalroq Kontening “Tottenhem”dagi yillik maoshi yiliga 18,3 million yevroni tashkil qilishi haqida xabar berilgandi.
Messi noma’lum muddatga safdan chiqdi
“PSJ” hujumchisi Lionel Messi tizzasidan olgan jarohati tufayli noma’lum muddatga safdan chiqdi.
Infobae xabariga ko‘ra, argentinalik futbolchi Parij klubining bo‘lajak bir nechta o‘yinlarini o‘tkazib yuboradi. U ushbu jarohatini sentabr oyida, Argentina terma jamoasi safida Venesuelaga qarshi o‘yinda (3:1) olgan.
Messini o‘shandan keyin og‘riqlar bezovta qilib kelgan. Tiklanish biroz vaqt talab qilishi mumkin. 34 yoshli futbolchi Madriddagi klinikalardan birida reabilitatsiya kursini o‘tishni rejalashtirgan.
Shuningdek, Messi 3-noyabr kuni Chempionlar Ligasi doirasida bo‘lib o‘tadigan “Leypsig”ga qarshi o‘yinda ham jamoasiga yordam bera olmaydi.
Aguero yuragidagi muammo sabab kamida 3 oy davomida maydonga tusha olmaydi
“Barselona” hujumchi Serxio Agueroning sog‘lig‘i borasida bayonot berdi.
Kataloniya klubi matbuot xizmati xabariga ko‘ra, argentinalik futbolchi yuragi bilan bog‘liq muammolardan so‘ng kamida 3 oy davomida maydonga tusha olmaydi.
Ta’kidlanishicha, Aguero tibbiy ko‘rikdan o‘tgan, davolash metodikalari tiklanish tempiga qarab olib boriladi.
33 yoshli hujumchi La Liga 12-turi doirasidagi “Alaves”ga qarshi o‘yinning (1:1) 41-daqiqasida ko‘krak qafasidagi og‘riq va yengil taxikardiya tufayli maydonni erta tark etgandi. Uning bir necha kun davomida shifoxonada shifokorlar nazoratida bo‘lgani ta’kidlanmoqda.
“Real” Vinisius Juniorning maoshini 10 million yevroga oshirmoqchi
“Real” yarim himoyachi Vinisius Junior bilan yangi shartnoma imzolamoqchi.
Marca nashriga ko‘ra, madridliklar braziliyalik futbolchi bilan 2024-yilga qadar mo‘ljallangan shartnomani uzaytirish niyatida. O‘z navbatida yangi shartnomaga ko‘ra futbolchining maoshi ham sezilarli darajada oshiriladi.
Ayni damda Vinisius jamoaning eng kam maosh oladigan futbolchilaridan biri sanaladi. Uning maoshi soliqlargacha yiliga 3,5 mln yevroni tashkil qiladi. Yangi shartnomadan keyin esa hujumkor yarim himoyachining yillik maoshi 10 million yevroga ko‘tarilishi aytilmoqda.
Ronaldu ketma-ket ikkinchi marta “Manchester Yunayted”da oy futbolchisi bo‘ldi
“Manchester Yunayted” hujumchisi Krishtianu Ronaldu jamoaning oktabr oyidagi eng yaxshi futbolchisi deb topildi.
36 yoshli hujumchi muxlislarning 57% ovozini qo‘lga kiritdi. Ikkinchi o‘rinni darvozabon David De Xea, uchinchi o‘rinni esa hujumchi Markus Reshford egallagan.
Ronaldu oktabr oyida “Manchester Yunayted” tarkibida beshta o‘yinda maydonga tushib, ikkita gol urdi va bitta golli uzatmani amalga oshirdi. Qayd etish lozim, Krishtianu sentbar oyida ham mazkur sovrinni qo‘lga kiritgandi.
Blatter va Platini 2 million dollarni o‘zlashtirganlikda ayblanmoqda
Shveysariya Bosh prokuraturasi FIFA sobiq prezidenti Yozef Blatter va UEFA sobiq prezidenti Mishel Platinini firibgarlikda ayblamoqda.
“Bosh prokuratura Yozef Blatterni firibgarlik, pul mablag‘larini o‘zlashtirish va hujjatlarni qalbakilashtirishda ayblaydi.
Mishel Platini firibgarlikda, shuningdek, mablag‘larni o‘zlashtirish va hujjatlarni qalbakilashtirishda ishtirok etganlikda gumonlanmoqda”, — deyiladi xabarda.
Xabar qilinishicha, sobiq futbol amaldorlari 2 million Shveysariya frankini (2,19 million dollar) o‘zlashtirishda ayblanmoqda.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)