2021-yil 26-oktabr kuni Koreya Respublikasi sobiq prezidenti Ro De U 89 yoshida vafot etdi. U 1988–1993-yillarda mamlakatni boshqargandi. Janubiy Koreya uning prezidentlik davrida Sobiq Ittifoq bilan diplomatik munosabatlar o‘rnatgan va KXDRga hujum qilmaslik haqidagi kelishuvni imzolagandi. “Kommersant” siyosatchining hayoti va siyosiy karyerasining yorqin lahzalari aks etgan suratlar jamlanmasini taqdim etdi.
Ro De U 1932-yil 4-dekabrda Teguda tavallud topgan. Harbiy akademiyani tamomlagan, u yerda Koreyaning bo‘lg‘usi prezidenti Chon Du Xvan (1980–1988-yillarda davlat rahbari bo‘lgan) bilan birga tahsil olgan.
Harbiy ta’limdan keyin u AQShda amaliyot o‘tagan. 1980-yilda Kvanjudagi isyon vaqtida desant-parashyutchilar bo‘linmasiga qo‘mondonlik qilgan. Qo‘zg‘olon hukumat kuchlari tomonidan ayovsiz bostirilgan 2 ming nafarga yaqin odam halok bo‘lgan. 1981-yilda harbiy xizmatdan ketgan, keyinchalik bir qator davlat idoralarida ishlagan, xususan, sport hamda Ichki ishlar vazirliklarida faoliyat olib borgan.
Ro De U prezident Chon Du Xvanning maslakdoshi bo‘lgan, uning administratsiyasida ishlagan va siyosiy jihatdan uning merosxo‘ri hisoblangan. Demokratik liberal partiyaga rahbarlik qilgan. 1987-yilda u mamlakatdagi birinchi demokratik saylovlarda g‘alaba qozongan va muxolifat nomzodlarini ortda qoldirgan. Keyinchalik muxolifat vakillari Kim Yon Sam va Kim De Chjun ham prezidentlik lavozimini egallagan.
Ro De U boshqaruvida Janubiy Koreya BMT a’zoligiga qabul qilingan va Shimoliy Koreyaga hujum qilmaslik haqidagi kelishuvni imzolagan.
1990-yilda Janubiy Koreya SSSR, Vengriya, Polsha va Yugoslaviya kabi davlatlar bilan diplomatik munosabatlar o‘rnatgan.
Ro De U rahbarligi davri demokratlashtirish uchun faol kurashish, Seulda va boshqa shaharlarda talabalar hamda demokratik kuchlarning namoyishlari bilan tarixda qolgan.
Prezident Ro De U bir vaqtning o‘zidan ham AQSh ham Rossiya prezidentlari bilan do‘stona munosabatlar o‘rnata olgandi.
1996-yilda Ro De U 1979-yilda davlat to‘ntarishini amalga oshirishga uringanlikda va korrupsiyada ayblanib, jinoiy javobgarlikka tortilgan.
Tergov ma’lumotlariga ko‘ra Ro De U davlat rahbari bo‘lgan vaqtida Koreyaning katta tadbirkorlaridan siyosiy fondlarga xayriya shaklida taxminan 350 million AQSh dollari miqdorida pora olgan. Shuningdek, unga Kvanju voqealarida davlatga xiyonat qilganligi bo‘yicha ham ayblov e’lon qilingan.
Sobiq prezident korrupsiyada aybdor ekanligini tan olgan va xalqdan kechirim so‘ragan.
1996-yil avgustida sobiq prezident 22 yil muddatga ozodlikdan mahrum qilindi. Keyinchalik jazo yengillashdi va 17 yilgacha qisqardi. Ro De Uga 1998-yilda Kim De Chjun prezidentligi davrida amnistiya berildi.
Ro De U 2021-yil 26-oktabr kuni 89 yoshda vafot etdi. Siyosatchining o‘limiga nima sabab bo‘lgani oshkor qilinmagan. Avval sobiq prezidentning sog‘lig‘i bilan bog‘liq muammolar sabab kasalxonaga yotqizilgani xabar qilingandi.
Izoh (0)