2021 йил 26 октябрь куни Корея Республикаси собиқ президенти Ро Де У 89 ёшида вафот этди. У 1988–1993 йилларда мамлакатни бошқарганди. Жанубий Корея унинг президентлик даврида Собиқ Иттифоқ билан дипломатик муносабатлар ўрнатган ва КХДРга ҳужум қилмаслик ҳақидаги келишувни имзолаганди. «Коммерсантъ» сиёсатчининг ҳаёти ва сиёсий карьерасининг ёрқин лаҳзалари акс этган суратлар жамланмасини тақдим этди.
Ро Де У 1932 йил 4 декабрда Тегуда таваллуд топган. Ҳарбий академияни тамомлаган, у ерда Кореянинг бўлғуси президенти Чон Ду Хван (1980–1988 йилларда давлат раҳбари бўлган) билан бирга таҳсил олган.
Ҳарбий таълимдан кейин у АҚШда амалиёт ўтаган. 1980 йилда Кванжудаги исён вақтида десант-парашютчилар бўлинмасига қўмондонлик қилган. Қўзғолон ҳукумат кучлари томонидан аёвсиз бостирилган 2 минг нафарга яқин одам ҳалок бўлган. 1981 йилда ҳарбий хизматдан кетган, кейинчалик бир қатор давлат идораларида ишлаган, хусусан, спорт ҳамда Ички ишлар вазирликларида фаолият олиб борган.
Ро Де У президент Чон Ду Хваннинг маслакдоши бўлган, унинг администрациясида ишлаган ва сиёсий жиҳатдан унинг меросхўри ҳисобланган. Демократик либерал партияга раҳбарлик қилган. 1987 йилда у мамлакатдаги биринчи демократик сайловларда ғалаба қозонган ва мухолифат номзодларини ортда қолдирган. Кейинчалик мухолифат вакиллари Ким Ён Сам ва Ким Де Чжун ҳам президентлик лавозимини эгаллаган.
Ро Де У бошқарувида Жанубий Корея БМТ аъзолигига қабул қилинган ва Шимолий Кореяга ҳужум қилмаслик ҳақидаги келишувни имзолаган.
1990 йилда Жанубий Корея СССР, Венгрия, Польша ва Югославия каби давлатлар билан дипломатик муносабатлар ўрнатган.
Ро Де У раҳбарлиги даври демократлаштириш учун фаол курашиш, Сеулда ва бошқа шаҳарларда талабалар ҳамда демократик кучларнинг намойишлари билан тарихда қолган.
Президент Ро Де У бир вақтнинг ўзидан ҳам АҚШ ҳам Россия президентлари билан дўстона муносабатлар ўрната олганди.
1996 йилда Ро Де У 1979 йилда давлат тўнтаришини амалга оширишга уринганликда ва коррупцияда айбланиб, жиноий жавобгарликка тортилган.
Тергов маълумотларига кўра Ро Де У давлат раҳбари бўлган вақтида Кореянинг катта тадбиркорларидан сиёсий фондларга хайрия шаклида тахминан 350 миллион АҚШ доллари миқдорида пора олган. Шунингдек, унга Кванжу воқеаларида давлатга хиёнат қилганлиги бўйича ҳам айблов эълон қилинган.
Собиқ президент коррупцияда айбдор эканлигини тан олган ва халқдан кечирим сўраган.
1996 йил августида собиқ президент 22 йил муддатга озодликдан маҳрум қилинди. Кейинчалик жазо енгиллашди ва 17 йилгача қисқарди. Ро Де Уга 1998 йилда Ким Де Чжун президентлиги даврида амнистия берилди.
Ро Де У 2021 йил 26 октябрь куни 89 ёшда вафот этди. Сиёсатчининг ўлимига нима сабаб бўлгани ошкор қилинмаган. Аввал собиқ президентнинг соғлиғи билан боғлиқ муаммолар сабаб касалхонага ётқизилгани хабар қилинганди.
Изоҳ (0)