Gruziya Markaziy Saylov komissiyasi mahalliy hokimiyat uchun saylovlarning 30-oktabr, shanba kuni bo‘lib o‘tgan ikkinchi bosqichida ovoz berish natijalarini sanab chiqishni yakunladi. 20 ta munitsipalitetdan 19 tasida, jumladan, o‘zini o‘zi boshqaradigan beshta yirik shahar – Tbilisi, Kutaisi, Batumi, Poti va Rustavida hukmron “Gruziya orzusi” partiyasi nomzodlari g‘alaba qozondi.
Birgina Gruziya g‘arbidagi Salenjixa munitsipalitetida muxolifatchi “Yagona milliy harakat” (YMH) partiyasidan nomzod Giorgiy Xarchilava saylovlarda g‘alaba qozondi.
Norasmiy rahbari Gruziyaning sobiq prezidenti Mixail Saakashvili hisoblanadigan YMH partiyasi yetakchilari yakshanbaga o‘tar kechasi mahalliy saylovlarning ikkinchi bosqichi natijalarini tan olmasliklarini ma’lum qildi, ularning fikricha, natijalar hukumat tomonidan soxtalashtirilgan.
“Gruziyada saylovlar bekor qilindi. Ularni oligarx Bidzin Ivanishvili sharoitida o‘tkazib bo‘lmaydi. Ertaga biz amaldagi tuzumga qarshi murosasiz bo‘ladigan kurashning aniq rejasini taqdim etamiz”, — dedi YMH raisi, Tbilisi merligiga nomzod Nikonor Meliya.
Avvalroq Rustavi shahri merligiga nomzod, “YMH” partiyasi yetakchilaridan biri David Kirkitadze ham uning partiyasi “hukumat tomonidan soxtalashtirilgan” saylovlarning ikkinchi bosqichi natijalarini tan olmasligini aytgandi.
“Biz zo‘ravonlar tomonidan bizga qo‘yilgan saylov natijalarini qabul qilmaymiz va tegishli choralarni ko‘ramiz, jumladan, keskin norozilik bildiramiz. Hukumatning bunday zo‘ravonlik harakati hech qachon demokratik saylov sifatida tan olinmaydi. Biz kurashish niyatidamiz”, — degan Kirkitadze.
Uning so‘zlariga ko‘ra, “Yagona milliy harakat” partiyasi yaqin orada “kurash usullari va strategiyalari, jumladan, hukumatga bo‘ysunmaslik va ko‘cha harakatlari” haqida hisobot beradi.
Gruziya MSKning dastlabki ma’lumotlariga ko‘ra, Kirkitadze Rustavidagi saylovlarda 7 foizlik farq bilan hukmron partiya nomzodi Nino Latsabidzega yutqazgan.
“YMH”ning yana bir yetakchisi Giorgiy Baramidze muxolifatchi “Pirveli TV” telekanali efirida muxolifat “tinch inqilob”ni boshlayotganini aytdi.
“Dushanba kunidan (1-noyabr) qattiq norozilik va hukumatga fuqarolar itoatsizligi boshlanadi. Biz har bir shaharda davlat muassasalari oldida chodirlar quramiz. Har kuni norozilik namoyishlari bo‘ladi. Bularning barchasi xalqqa qarshi bo‘lgan hukumat siyosiy sahnani tark etmaguncha davom etadi”, — dedi Baramidze.
U Rustavi qamoqxonasida saqlanayotgan Saakashvilini ochlikni to‘xtatib, hozirgi Gruziya hukumatiga qarshi kurashga qo‘shilishga chaqirdi.
Izoh (0)