Buyuk Britaniya qirolichasi Yelizaveta II tibbiyot xodimlarining tavsiyasiga binoan kamida ikki hafta yengillashtirilgan rejimda ishlaydi. Bu haqda Bukingem saroyi bayonotiga tayanib, “Interfaks” xabar berdi.
“Shifokorlar bu vaqt davomida hazrati oliyalariga faqat yengil yumushlarni, xususan, ayrim qabullarni onlayn formatda o‘tkazishni, biroq hech qanday rasmiy tashriflarni amalga oshirmaslikni tavsiya qildi”, — deyiladi unda.
Shu haftada Buyuk Britaniya qirolichasi avvalroq rejalashtirilganidek Glazgoda o‘tkaziladigan iqlim bo‘yicha sammitga bormasligi ma’lum bo‘lgan.
Eslatib o‘tamiz, oktabr boshlarida 95 yoshli qirolicha Yelizaveta II bir kecha shifoxonada qolgan. U shifoxonaga tushib qolishidan oldin Shimoliy Irlandiyaga tashrifini bekor qilgan. Bukingem saroyi vakili o‘shanda “ayrim dastlabki tekshiruvlar o‘tkazilgani”ni ma’lum qilgandi.
Avvalroq Qirolicha Yelizaveta II ga shifokorlar spirtli ichimliklardan voz kechishni tavsiya qilgani to‘g‘risida xabar berilgandi. Qirollik saroyidagi xabardor manbalarning ma’lum qilishicha, qirolicha bu tavsiyani jiddiy qabul qilib, spirtli ichimliklardan butunlay voz kechishga qaror qilgan, biroq ilgari ham uni ko‘p ichadi deb bo‘lmasdi. Endi u hatto sevimli “Martini” kokteyllaridan voz kechgan va faqat Malvern suvini ichmoqda.
Izoh (0)