Saudiya Arabistoni hukumati Livan elchisiga mamlakatni tark etishi uchun 48 soat muddat berdi. Bu haqda Saudi Gazette’ga tayanib, “Korrespondent.net” xabar berdi.
Avvalroq mamlakat hukumati Livandagi elchisini konsultatsiya uchun chaqirib olgandi.
Diplomatik mojaroga Livan axborot vaziri Georg Kordaxining avgust oyida Al-Jazeera telekanaliga bergan intervyusida Yamandagi Saudiya Arabistoni boshchiligidagi koalitsiya harakatlarini bosqinchilik deb atagani sabab bo‘lgan.
MTV kanalining ma’lum qilishicha, Livan bilan diplomatik munosabatlarni Fors ko‘rfazi arab davlatlarining hamkorlik kengashiga a’zo barcha davlatlar (Saudiya Arabistonidan tashqari, Qatar, Kuvayt, BAA, Bahrayn va Ummon) uzishga tayyor.
Livan bosh vaziri Najib Mikati Saudiya Arabistonining Bayrutdagi elchisini chaqirib olish borasidagi qaroridan afsusda ekanini bildirgan. U Bayrut podshohlik tomonidan ushbu pozitsiyani qayta ko‘rib chiqishiga umid qilishini bildirgan.
“Biz Saudiya Arabistonining qaroridan chuqur afsusdamiz va podshohlik rahbariyati donolik bilan uni qayta ko‘rib chiqishiga umid qilamiz. Biz o‘z tomonimizdan vaziyatni to‘g‘rilash uchun barcha harakat va tirishqoqligimizni sarflashni davom ettiramiz”, — deydi u.
“Kommersant”ning yozishicha, Bahrayn ham Livan elchisidan mamlakatni 48 soat ichida tark etishni talab qilgan.
Avvalroq Livan bosh vaziri Bayrutdagi portlash tergovi borasida Rossiyadan yordam so‘rash masalasini sud hal qilishini bildirgani, Bayrut markazida norozilik namoyishlaridagi qonli otishmada olti kishi halok bo‘lgani to‘g‘risida xabar berilgandi.
Izoh (0)