Shavkat Mirziyoyev “O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonunni imzoladi.
Qonun bilan, jumladan, Ma’muriy javobgarlik to‘g‘risidagi kodeksga o‘zgartirish kiritildi.
Unga ko‘ra, axborot texnologiyalaridan foydalangan holda, shu jumladan, internetda fuqarolarning shaxsga doir ma’lumotlariga ishlov berilayotganda O‘zbekistonda joylashgan texnik vositalarda hamda shaxsga doir ma’lumotlar bazalarida shaxsga doir ma’lumotlarni yig‘ishga, tizimlashtirishga va saqlashga oid talablarga rioya etmaslik fuqarolarga BHMning 7 baravari (1 million 890 ming so‘m), mansabdor shaxslarga esa 50 baravari (13 million 500 ming so‘m) miqdorida jarima solishga sabab bo‘ladi.
Qonun bilan, shuningdek, Jinoyat kodeksiga kiritilgan o‘zgartirishga ko‘ra, ushbu qilmish ma’muriy jazo qo‘llangandan so‘ng bir yil davomida takroran sodir etilgan taqdirda, quyidagi jazo choralaridan biri qo‘llanadi:
- BHMning 150 baravarigacha (40 million 500 ming so‘mgacha) miqdorda jarima;
- 3 yilgacha muayyan huquqdan mahrum qilish;
- 2 yilgacha axloq tuzatish ishlari.
Bundan avval O‘zbekistonda shaxsga doir ma’lumotlarni noqonuniy tarqatganlik uchun jinoiy javobgarlik kuchaytirilishi, O‘zbekiston fuqarolarining ma’lumotlarini xorijda saqlaydigan saytlar jarimaga tortilishi hamda O‘zbekiston fuqarolarining shaxsiy ma’lumotlarini mamlakatda saqlash majburiy bo‘lishi haqida xabar berilgandi.
Izoh (0)