“Kusherbayev ko‘tarayotgan muammolar global, uni hazm qilish kerak, Dusovda esa emotsiya bor, ammo haqiqati ko‘p” — Qashqadaryo hokimi ijtimoiy tarmoqlarda kimlarni kuzatishi haqida

Qashqadaryo viloyati hokimi Zoir Mirzayev ijtimoiy tarmoqlarni doimo kuzatib borishini, ayniqsa, deputat Rasul Kusherbayev hamda Qobil Dusovlar ko‘tarayotgan masalalarga diqqat qilishini, shuningdek, qashqadaryolik blogerlar Kapitan Karimov hamda Husan Komiljonovlarni o‘qib borishini ma’lum qildi. Bu haqda viloyat hokimi “Daryo” muxbiri bilan suhbatda gapirdi.

“Har kuni tongda birinchi galda ‘Daryo.uz’, ‘Kun.uz’, ‘Gazeta.uz’ hamda O‘zbekiston milliy axborot agentligini diqqat bilan o‘qib chiqaman. Rasmiy xabarlarni o‘qib chiqqanimdan so‘ng, ko‘pchilik rahbarlarga dolzarb masalalarni qo‘yuvchi deputat Rasul Kusherbayevning shaxsiy kanalini kuzataman. Qolaversa, Qobil Dusovni, qashqadaryolik blogerlardan — Kapitan Karimovni, Husan Komiljonovlarni o‘qiyman. Masalan, deputat Kusherbayevning shaxsiy Telegram-kanalida ko‘tarib chiqilayotgan muammolar global, uni faqat hazm qila olish kerak. Tanasidan o‘tkazish kerak. Qobil Dusovda ham. To‘g‘ri, Qobil Dusovda emotsiya bordir. Ammo ichida haqiqati bor. ‘Asanov formati’ degan kanalni ham kuzataman. Eldar Asanovda odamni mulohazaga yo‘naltiradigan, millat taqdiri, til taqdiri va qadriyatlarni esga tushiruvchi ko‘p gaplar bor”, — deydi viloyat hokimi Zoir Mirzayev.

Zoir Mirzayev suhbat davomida jurnalistlardan Sherzod Qudratxo‘ja bilan doimiy muloqot qilib turishini, fikr almashishini ma’lum qilgan.

“Sherzod Qudratxo‘ja bilan ko‘p muloqot qilamiz. Fikr almashamiz. U yangilik qilsa, menga yuboradi, men esa unga. Xullas, doimiy ravishda fikr almashamiz. Boisi Qudratxo‘jada jurnalistik yondashuv, kreativ g‘oyalar ko‘p. Ishi ham menga ma’qul. Masalan, bugun Qashqadaryoda bo‘lsa, ertaga Surxondaryoda. Shuningdek, ikki-uch soatlik muammolarni qisqa vaqtda tomoshabinga yetkaza oladi. Respublikadagi muammolardan xabardor va shu muammolarni chiroyli olib chiqadi”, — deydi viloyat hokimi.

Qashqadaryo hokimi “Daryo” muxbirining “viloyatdagi har qanday muammo ijtimoiy tarmoqlar yoki internet saytlarida yoritilishi bilanoq shaxsan munosabat bildirasiz. Viloyatdagi tashvishlardan ortib ijtimoiy tarmoqlarni shaxsan o‘zingiz kuzatasizmi? Yoki muammolar haqida matbuot kotibingiz xabar beradimi?”, degan savoliga “viloyatga taalluqli barcha muammoni shaxsan o‘zim o‘qiyman va mas’ullarga muammo bilan shug‘ullanish haqida topshiriq beraman”, — dedi.

“Tumanlarga yoki viloyatning eng chekka hududiga yo‘lga chiqqanimda yo‘lda yurishga ikki soat vaqt sarflayman. Yo‘l yurish uchun ketgan ikki soat vaqtimni behuda sarflamaslik maqsadida shunday paytda Facebook’ga kirib, viloyatga taalluqli barcha muammolar bilan tanishib chiqaman. Va har bir muammoni tegishliligi bo‘yicha o‘rinbosarlarimga, tashkilot rahbarlariga yuborib, muammo bilan shug‘ullanishi kerakligi haqida topshiriq beraman. Shuningdek, MTRKning internetdagi manziliga kirib, retro asarlar, retro qo‘shiqlarni eshitaman. Uzoq yo‘lga chiqqanimda bir soat yoki ikki soat yo‘lda yurishimga to‘g‘ri kelsa, mashinada yo‘l-yo‘lakay shunday asarlarni tinglab boraman”, — deydi viloyat hokimi Zoir Mirzayev savolga javob berar ekan.