Ўзбекистонда шахсга доир маълумотларни муҳофаза қилиш бўйича талабларни бузганлик юзасидан жавобгарлик кучайтирилди

Шавкат Мирзиёев «Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги қонунни имзолади.

Қонун билан, жумладан, Маъмурий жавобгарлик тўғрисидаги кодексга ўзгартириш киритилди.

Унга кўра, ахборот технологияларидан фойдаланган ҳолда, шу жумладан, интернетда фуқароларнинг шахсга доир маълумотларига ишлов берилаётганда Ўзбекистонда жойлашган техник воситаларда ҳамда шахсга доир маълумотлар базаларида шахсга доир маълумотларни йиғишга, тизимлаштиришга ва сақлашга оид талабларга риоя этмаслик фуқароларга БҲМнинг 7 баравари (1 миллион 890 минг сўм), мансабдор шахсларга эса 50 баравари (13 миллион 500 минг сўм) миқдорида жарима солишга сабаб бўлади.

Қонун билан, шунингдек, Жиноят кодексига киритилган ўзгартиришга кўра, ушбу қилмиш маъмурий жазо қўллангандан сўнг бир йил давомида такроран содир этилган тақдирда, қуйидаги жазо чораларидан бири қўлланади:

• БҲМнинг 150 бараваригача (40 миллион 500 минг сўмгача) миқдорда жарима;
• 3 йилгача муайян ҳуқуқдан маҳрум қилиш;
• 2 йилгача ахлоқ тузатиш ишлари.

Бундан аввал Ўзбекистонда шахсга доир маълумотларни ноқонуний тарқатганлик учун жиноий жавобгарлик кучайтирилиши, Ўзбекистон фуқароларининг маълумотларини хорижда сақлайдиган сайтлар жаримага тортилиши ҳамда Ўзбекистон фуқароларининг шахсий маълумотларини мамлакатда сақлаш мажбурий бўлиши ҳақида хабар берилганди.