Bosh prokuratura Toshkent viloyati Angren shahrida 11 yoshli qiz “Seftriakson” dori vositasi sabab vafot etgani haqida tarqalgan xabarlar yuzasidan ma’lumot berdi.
O‘zini marhumaning opasi deya tanishtirgan Sevdo Tillayeva ismli Facebook foydalanuvchisining yozishicha, 19-oktabr kuni shifokor retsepti bilan 11 yoshli singlisi G.R.ga “Seftriakson” qilingan va 3 daqiqa ichida inyeksiya reaksiya bera boshlagan (ko‘ngil aynish, tirnoqlari ko‘kara boshlagan, qovoqlarida jigarrang halqalar paydo bo‘lgan, ko‘zlari qizarib ketgan). Ukoldan 10 daqiqa o‘tib, qiz Angren shahridagi bolalar shifoxonasiga yetkazilgan.
Ko‘rsatilgan yordamga qaramay, 20-oktabr kuni qizcha vafot etgan. Shifokorlar xulosasiga ko‘ra, unda bronxit va anafilaktik shok kuzatilgan.
“Singlimda surunkali bronxit borligi sabab u oldin ham bir necha bor ‘Seftriaksion’ olgan. Shifokorlarning so‘zlariga ko‘ra, bu Angrendagi uchinchi o‘lim holati, dorixonalarda esa ushbu inyeksiya sotilmoqda. Bu vosita Rossiyadan olib kelingani aniqlandi, dori vositalarining yarmidan ko‘pi sotuvdan qaytarilgan bo‘lsa-da, bir qismi tarqalib ketgan”, — deb yozadi u.
Angren shahar prokuraturasi tomonidan ushbu holat yuzasidan tergovga qadar tekshiruv harakatlari o‘tkazilmoqda. Toshkent viloyati prokuraturasi tomonidan nazorat o‘rnatilgan.
Avvalroq Toshkent viloyatida emlangandan so‘ng vafot etgan fuqaro o‘limiga vaksina sabab bo‘lmagani aniqlangan edi.
Izoh (0)