2023/2024-o‘quv yilidan Toshkent davlat yuridik universitetiga o‘qishga kirishda huquqiy fanlardan test topshirish amaliyoti joriy etiladi. Bu haqda Telegram’dagi “Huquqiy axborot” kanali xabar berdi.
Bugungi kunda Toshkent davlat yuridik universitetiga o‘qishga kirishda abituriyentlar 2 ta bo‘limdan iborat 5 ta fan majmuasidan test sinovlari topshiradi. Bular:
- 1-bo‘limda barcha yo‘nalishlar uchun majburiy 3 ta fan – ona tili (o‘zbek, rus yoki qoraqalpoq tili), matematika va O‘zbekiston tarixi;
- 2-bo‘limda yurisprudensiya ta’lim yo‘nalishi bo‘yicha 2 ta fan – tarix va chet tili fanlari.
Mazkur taklifning joriy etilishi bir qator ijobiy natijalarga xizmat qiladi, xususan:
- maktab yoshidanoq bolalarning huquqiy fanlarni chuqur o‘zlashtirishiga, konstitutsiya va qonunlarni puxta o‘rganishiga;
- maktablarda sifatli, xalqaro standartlarga mos yuridik darsliklarning yaratilishiga;
- huquqshunoslik fanlaridan ta’lim beruvchi o‘qituvchilarga nisbatan qo‘yiladigan talablar oshishi natijasida ularning malakasini doimiy oshirib borishi uchun mustahkam zamin yaratishga;
- TDYuUga dastlabki huquqiy bilimlarga ega yosh avlod vakillari kirib kelishiga erishiladi.
Eslatib o‘tamiz, 2021-yilning iyunida “Toshkent davlat yuridik universiteti qoshidagi akademik litseyning bitiruvchilari Toshkent davlat yuridik universitetiga yakka tartibda suhbat o‘tkazish orqali o‘qishga qabul qilish tartibi to‘g‘risidagi nizomni tasdiqlash haqida”gi buyruq Adliya vazirligida davlat ro‘yxatidan o‘tkazilgandi. Nizomga ko‘ra, ayrim abituriyentlar Toshkent davlat yuridik universitetiga imtihonsiz qabul qilinishi mumkin.
Izoh (0)