O‘zbekistonda 2021-yilning 9 oyida vazirliklar budjetdan qariyb 84 mlrd so‘m o‘zlashtirgan. Bu o‘tgan yilgiga nisbatan 3 barobar ko‘p

Davlat moliyaviy nazorati boshqarmasi va uning hududiy boshqarmalari tomonidan 2021-yilning 9 oyi davomida budjet intizomiga rioya etilishi va budjet mablag‘larining maqsadli sarflanishi yuzasidan o‘tkazilgan nazorat tadbirlari natijasida 83,7 milliard so‘mlik kamomad va o‘zlashtirish holatlariga yo‘l qo‘yilgani oshkor qilingan. Bu haqda Moliya vazirligi matbuot xizmati xabar berdi.

Ma’lumotlarga ko‘ra, budjet mablag‘lari hisobidan asossiz va ortiqcha to‘lovlar 457,7 milliard so‘m, nomaqbul xarajatlar 187,3 milliard so‘mni tashkil etgan. Hisobot davrida 365 milliard so‘mlik budjet mablag‘larining noqonuniy sarflanishining oldi olindi.

2021-yilning hisobot davrida aniqlangan pul mablag‘lari va moddiy boyliklarning kamomad va o‘zlashtirish (83,7 milliard so‘m) holatlari 2020-yilning 9 oyiga (28 milliard so‘m) nisbatan 3 barobarga oshgan.

• Oliy va o‘rta maxsus ta’lim vazirligi – 23,3 milliard so‘m (2020-yil 9 oyi uchun 13 milliard so‘m);
• Sog‘liqni saqlash vazirligi – 17,2 milliard so‘m (3,9 milliard so‘m);
• Xalq ta’limi vazirligi – 14,4 milliard so‘m (15,4 milliard so‘m);
• Maktabgacha ta’lim vazirligi – 5,7 milliard so‘m (3,8 milliard so‘m);
• Madaniyat vazirligi – 2,7 milliard so‘m (1 milliard so‘m).

Boshqa bo‘limlarga nisbatan kamomad va mablag‘larni o‘g‘irlash holatlari eng kami – 2,5 milliard so‘m (1 milliard so‘m) hokimliklarning obodonlashtirish bo‘limlarida aniqlangan.

Bundan tashqari, tekshirishlar natijasida 457,7 milliard so‘mlik moliyaviy xato va kamchiliklar, xususan, ish haqi va unga tenglashtirilgan to‘lovlarning asossiz ravishda ortiqcha to‘lanishi, qurilish-ta’mirlash ishlarining bahosini oshirib ko‘rsatilishi hamda bajarilmagan ish hajmlarining hisobdan chiqarilishi, inventar qimmatliklarini oshirilgan narxlarda sotib olishga to‘g‘ri keladi. Bu 2021-yilning 9 oyiga (101,4 milliard so‘m) nisbatan 4,5 barobar ko‘pdir.

• Xalq ta’limi vazirligi – 61,1 milliard so‘m (2020-yil 9 oyi uchun 25,4 milliard so‘m);
• Maktabgacha ta’lim vazirligi – 61,1 milliard so‘m (6,9 milliard so‘m);
• Sog‘liqni saqlash vazirligi – 39,1 milliard so‘m (17,7 milliard so‘m);
• Uy-joy kommunal xizmat ko‘rsatish vazirligi – 27,3 milliard so‘m (6,3 milliard so‘m);
• Madaniyat vazirligi – 18,4 milliard so‘m (2020-yil 9 oyda 2 milliard so‘m).

Tekshiruv natijalariga ko‘ra, hisobot davrida aniqlangan moliyaviy xato va kamchiliklarning 510,8 milliard so‘mi budjetga tiklanganligi ta’minlandi.

Shu bilan birga, nazorat tadbirlari davomida budjet muassasalarining xarajatlar smetasi va shtatlarida asossiz rejalashtirilgan mablag‘larni qisqartirish va boshqa noqonuniy sarflanishiga chek qo‘yish hisobiga jami 365 milliard so‘mlik budjet mablag‘larining asossiz sarflanishining oldi olindi.

Budjet qonunchiligini buzganlik uchun budjet mablag‘larini oluvchi tashkilotlarning 15 nafar rahbari va boshqa mansabdor shaxslariga nisbatan ma’muriy huquqbuzarliklar to‘g‘risida bayonnomalar tuzildi. Hujjatlar ko‘rib chiqish uchun ma’muriy sudlarga yuborildi.

Shuningdek, 3847 ta nazorat tadbirlarida aniqlangan 724,1 milliard so‘mlik qonunbuzarliklar huquqiy baho berish uchun huquqni muhofaza qiluvchi organlarga yuborildi.