Pentagon Rossiya prezidenti Vladimir Putin va Amerika yetakchisi Jo Baydenning uchrashuvi arafasida Moskvani bezovta qilmaslik uchun gipertovushli qurollar sinovini keyinga qoldirgan. Bu haqda Politico manbalarga tayanib yozdi.
Nashrning yozishicha, Oq uy Pentagondan sinovlarni kechiktirishni so‘ragan, AQSh Rossiya bunday signalni noto‘g‘ri talqin qilishi yoki ushbu qurollarning ishga tushirilishi uchrashuvga butunlay putur yetkazishidan xavotirlangan.
AQSh Mudofaa vazirligidagi manbaning qayd etishicha, Rossiya ham o‘z navbatida sammit oldidan “provokatsion ishlar” qilmagan.
Putin va Bayden 16-iyun kuni Jenevada uchrashgandi. Muzokaralar deyarli to‘rt soat davom etgan. Yakunda siyosiy yetakchilar strategik qurollarni nazorat qilish bo‘yicha qo‘shma bayonot qabul qildi. “Bugun biz yadroviy urushda g‘olib bo‘lishi mumkin emas va uni hech qachon qo‘zg‘atmaslik kerak degan tamoyilga sodiqligimizni yana bir bor tasdiqlaymiz”, — deyiladi unda.
Putin muzokaralarda har ikki tomondan hech qanday dushmanlik yoki bosim bo‘lmaganini va uchrashuv “aniq, mazmunli” o‘tganini aytdi. Bayden sammitdagi muhitni “yaxshi va ijobiy” deb ta’rifladi.
Iyul oyida Rossiya Mudofaa vazirligi “Sirkon” gipertovushli raketasi muvaffaqiyatli sinovdan o‘tkazilganini ma’lum qildi. Putin yozda “Sirkon” tez orada jangovar shay holatga kelishini e’lon qilgandi. Pentagon raketa sinovlarida potensial tahdidni ko‘rdi. “Rossiyaning yangi gipertovushli tizimlari potensial beqarorlashtiruvchi omil bo‘lib, jiddiy xavf tug‘diradi, chunki bu tizimlar yadroviy tizimlar bilan mos keladi”, — deyiladi AQSh bayonotida.
Mavzuga doir:
Izoh (0)