AQSh gipertovushli qurol ishlab chiqishda Rossiyadan ortda qolayotganini tan oldi

AQSh Rossiyani gipertovushli qurol ishlab chiqish borasida taqib qilishda davom etmoqda, ushbu poygada har bir dollar pul ahamiyatga ega, deydi Pentagon rahbari Mark Esper. Bu haqda “RIA Novosti” xabar bergan.

Kaliforniyada o‘tgan xavfsizlik forumida jurnalistlar Esperdan Rossiya bilan gipertovushli qurol borasidagi raqobat haqida so‘ragan.

“Biz ushbu texnologiya ishlab chiqilishida bir necha yil avval tanaffus e’lon qildik, u vaqtda bu borada yaqqol yetakchi edik, lekin endi taqibchi rolidamiz. Mudofaa vazirligi har bir dollarni gipertovushli qurol yo‘nalishida yana yetakchilikni qaytarib olish uchun safarbar etmoqda”, — deydi Esper.

“Rossiyaning turli qurollar, jumladan, CHB-III shartnomasiga zid strategik qurollar ishlab chiqayotganidan xavotirdaman. Ushbu harakatlar hisobotini olish yoki tekshirish imkoniyati yo‘q. So‘nggi yillarda avvalgi va hozirgi AQSh administratsiyasi Rossiyaning bu borada g‘irromlik qilayotganini guvohi bo‘lgan. Ayni vaqtda ular harbiy jihatdan bizga nisbatan kuchli potensialga ega, ayniqsa o‘rta va qisqa masofaga zarba bera oladigan raketalar borasida. Shu sababli ham ruslarning bu boradagi harakatlarini diqqat bilan kuzatyapmiz”, — deydi AQSh mudofaa vaziri.

Strategik qurollanishni kamaytirish va cheklash bo‘yicha CHB-III kelishuvi muddati 2021-yilda yakuniga yetadi, Vashington uni uzaytirish yoki bekor qilish yuzasidan bir to‘xtamga kelmagan.

Avval Qo‘shma Shtatlar Rossiya bilan kelishuvga nafaqat CHB-III kelishuviga aloqador qurol-yarog‘ balki yetkazib beriladigan qurollar, jumladan kam quvvatli yadro qurilmalari ham kiritilishi lozimligini bildirgan. Pentagon Rossiyada 2 mingtagacha nostrategik yadro quroli bor deb hisoblaydi.