Hindiston Xitoyning chegara hududlarini himoyalash to‘g‘risidagi yangi qonunidan xavotirda ekanini bildirdi. Bu haqda Reuters agentligiga tayanib, Tengrinews xabar berdi.
Xitoy 14 ta qo‘shni davlat, jumladan, Rossiya, Shimoliy Koreya va Hindiston bilan quruqlikdagi chegaralarini himoya qilish va ulardan foydalanish bo‘yicha yangi qonunni qabul qilgan. Qonun Xitoy xalq ozodlik armiyasiga va davlat muassasalariga mudofaa chizig‘ini himoya qilishda, infratuzilmani mustahkamlash va chegara hududlarida qurilishlarni amalga oshirish yo‘lida tinch aholidan foydalanish borasida keng vakolatlarni taqdim etadi.
Hindiston Ichki ishlar vazirligi vakili Arindam Bagchining ma’lum qilishicha, Xitoyning bu kabi qonunni qabul qilish borasidagi qarori chegaralarni boshqarish, shuningdek, chegara masalasida mavjud ikki tomonlama kelishuvlarga ta’sir ko‘rsatishi mumkin.
“Xitoyning chegaralarni boshqarish, shuningdek, chegara masalasi bo‘yicha mavjud ikki tomonlama kelishuvlarga ta’sir ko‘rsatishi mumkin bo‘lgan qonunni qabul qilish borasidagi bir tomonlama qaror bizda xavotir uyg‘otmoqda”, — deydi TIV rasmiy vakili.
Ma’lumot uchun, Xitoy va Hindiston o‘rtasida Kashmir shimolidagi tog‘li hududning bir qismi, shuningdek, shimoli-sharqiy Arunachal-Pradesh shtatidagi qariyb 60 ming kvadrat kilometr maydon kimga tegishli ekani bilan bog‘liq azaliy kelishmovchilik mavjud. Amaldagi nazorat chizig‘i Ladakh hududidan o‘tadi. 1962-yili ushbu kelishmovchilik chegara urushiga aylanib ketgan. 1993- va 1996-yillarda Xitoy va Hindiston o‘rtasidagi nizoli joylarda tinchlikni saqlash to‘g‘risidagi kelishuv imzolangan. Biroq bunga qaramay tomonlar o‘rtasida keskinlik hamon davom etmoqda. Xususan, 2020-yilda Xitoy va Hindiston o‘rtasidagi chegaraning bahsli hududida sodir bo‘lgan to‘qnashuv oqibatida 20 nafar hind askari halok bo‘lgandi.
Izoh (0)