Пентагон Россия президенти Владимир Путин ва Америка етакчиси Жо Байденнинг учрашуви арафасида Москвани безовта қилмаслик учун гипертовушли қуроллар синовини кейинга қолдирган. Бу ҳақда Politico манбаларга таяниб ёзди.
Нашрнинг ёзишича, Оқ уй Пентагондан синовларни кечиктиришни сўраган, АҚШ Россия бундай сигнални нотўғри талқин қилиши ёки ушбу қуролларнинг ишга туширилиши учрашувга бутунлай путур етказишидан хавотирланган.
АҚШ Мудофаа вазирлигидаги манбанинг қайд этишича, Россия ҳам ўз навбатида саммит олдидан «провокацион ишлар» қилмаган.
Путин ва Байден 16 июнь куни Женевада учрашганди. Музокаралар деярли тўрт соат давом этган. Якунда сиёсий етакчилар стратегик қуролларни назорат қилиш бўйича қўшма баёнот қабул қилди. «Бугун биз ядровий урушда ғолиб бўлиши мумкин эмас ва уни ҳеч қачон қўзғатмаслик керак деган тамойилга содиқлигимизни яна бир бор тасдиқлаймиз», — дейилади унда.
Путин музокараларда ҳар икки томондан ҳеч қандай душманлик ёки босим бўлмаганини ва учрашув «аниқ, мазмунли» ўтганини айтди. Байден саммитдаги муҳитни «яхши ва ижобий» деб таърифлади.
Июль ойида Россия Мудофаа вазирлиги «Циркон» гипертовушли ракетаси муваффақиятли синовдан ўтказилганини маълум қилди. Путин ёзда «Циркон» тез орада жанговар шай ҳолатга келишини эълон қилганди. Пентагон ракета синовларида потенциал таҳдидни кўрди. «Россиянинг янги гипертовушли тизимлари потенциал беқарорлаштирувчи омил бўлиб, жиддий хавф туғдиради, чунки бу тизимлар ядровий тизимлар билан мос келади», — дейилади АҚШ баёнотида.
Изоҳ (0)