AQSh prezidenti Jo Bayden administratsiyasi mamlakatning sobiq prezidenti Donald Trampning migratsiya siyosati oqibatida AQShning janubiy chegarasini kesib o‘tib, oilasidan ajralgan migrantlarga kompensatsiya to‘lash imkoniyatini ko‘rib chiqmoqda. The Wall Street Journal’ning yozishicha, to‘lovlarning umumiy miqdori 1 milliard dollardan ortishi mumkin, deb xabar beradi “TASS”.
Nashr ma’lumotlariga ko‘ra, kompensatsiya to‘lovi rejasi bilan AQSh Adliya vazirligi, Ichki xavfsizlik vazirligi va Sog‘liqni saqlash va ijtimoiy xizmatlar vazirligi shug‘ullanmoqda. Ta’kidlanishicha, jabr ko‘rgan oilaning har bir a’zosiga sharoitiga qarab 450 ming dollargacha to‘lanishi, Amerika hukumati ushbu maqsadlarga jami 1 milliard dollardan ortiq mablag‘ yo‘naltirishi mumkin. Ayni vaqtda 940 ga yaqin migrantlarning oilasi yetkazilgan zararni qoblab berilishi bo‘yicha da’vo kiritgan.
Da’vo kiritgan oilalardan birining manfaatini himoya qilayotgan “Amerika fuqarolik erkinligi himoyasi ittifoqi” inson huquqlarini himoya qilish tashkilotining qo‘shimcha qilishicha, Trampning siyosati oqibatida qochoqlarning 5,5 mingga yaqin farzandlari ota-onasidan ajralgan.
AQShning 45-prezidenti immigratsiya qonunlarini buzuvchilarga nisbatan “nol insoniylik” deb ataluvchi siyosatga amal qildi. U immigrantlarni tekshirishning yangi jarayonlarini joriy etish orqali ularning sonini cheklash va qabul qilinadigan qochoqlarni sonini qisqartirish tarafdori edi. Uning siyosati doirasida AQShning janubiy chegaralarini kesib o‘tgan oilalarning ko‘plab bolalari ota-onasidan ajralgan. 2021-yilning yanvarida Jo Bayden AQSh prezidenti lavozimiga kirishib, “yangi immigratsion siyosat”ni e’lon qildi, mazkur yo‘nalishdagi qonunchilikni yengillashtirdi va boshpana izlovchilarni Meksikaga yuborish dasturini tugatdi. Shundan so‘ng, Qo‘shma Shtatlarga kirishni istovchi migrantlar oqimi sezilarli darajada oshgan va ayni vaqtda 200 mingdan ortiqni tashkil etadi — bu XXI asr boshlaridagi maksimumga teng.
Eslatib o‘tamiz, 2021-yilning may oyida Bayden o‘tgan 2021-moliyaviy yilda qochqinlarni qabul qilish chegarasini 62,5 ming kishiga oshirgandi, undan avvalgi prezident Donald Tramp davrida ushbu kvota 1980-yildan buyon eng kam — 15 ming kishi uchun belgilangandi. Fevral oyida Bayden chet eldan qochqinlarni qabul qilish kvotasini 2022-moliya yilida 125 ming kishiga oshirish niyatida ekanini ma’lum qildi.
Izoh (0)