AQSh Demokratlar partiyasi a’zolari tomonidan taklif etilgan yangi “milliarderlar uchun soliq” ko‘plab badavlat amerikaliklarni mamlakatni tark etishga majbur qiladi. Bu haqda AQShning sobiq prezidenti Donald Tramp ma’lum qildi. Trampning so‘zlarini uning vakili Liz Xarrington Twitter’dagi sahifasi orqali e’lon qildi.
“Qaysi mamlakat ‘milliarderlar solig‘i’ yoki boylik uchun soliqda asosiy benefitsiar bo‘ladi? Badavlat insonlar va kompaniyalar Qo‘shma Shtatlarni yordamsiz ahvolda tashlab, qayerga ko‘chib ketadi?”, — deb yozadi sobiq prezident.
Trampning fikricha, badavlat insonlarning aksariyatidan AQShda bo‘lish talab etilmaydi. “Men dono boshqaruvchilarga ega ushbu mamlakatlarning barchasini bilaman va ular Kongressdagi radikal so‘l manyaklar nima qilayotganiga qiziqadi”, — deydi sobiq prezident.
“RBK”ning yozishicha, shuningdek, mazkur qonun loyihasiga SpaceX va Tesla kompaniyalari asoschisi Ilon Mask ham qarshi chiqqan. U AQShning davlat qarzi salkam 28,9 trillion dollarga yoki har bir amerikalik soliq to‘lovchi uchun 229 ming dollar to‘g‘ri kelishini ko‘rsatib o‘tgan. “Barcha milliarderlarga 100 foizli soliq o‘rnatilgan taqdirda ham, bu qarzning bir qismini yopadi, shunday ekan, qolgan qismi keng ommadan olinishi kerakligi ravshan. Bu matematikaning asoslari”, — deb yozadi Mask. Tesla asoschisi mamlakatning asosiy muammosi xarajatlar ekanini qayd etib, AQSh hukumatining milliarderlardan olgan pullari tugasa, “sizning pullaringizni olgani keladi”, deya qo‘shimga qilgan.
“Milliarderlar solig‘i”ni joriy etishni Oregon shtati gubernatoi Ron Uayden e’lon qilgan. Rejaga ko‘ra, AQShdagi badavlat insonlar sotilayotgan aksiyalar va obligatsiyalar qiymatining 23,8 foizi miqdorida har yili soliq to‘lashi kerak bo‘ladi. Demokratlarning rejasiga ko‘ra, qonun prezident Jo Bayden administratsiyasining ijtimoiy dasturini moliyalashtirishga imkon beradi. Rejaga ko‘ra, qonun 2022-yilda kuchga kiradi va kapitali 1 milliard yoki so‘nggi uch yil ichida yillik daromadi 100 million dollarga teng insonlarga taalluqli bo‘ladi.
Avvalroq Tramp 25 yil ichida ilk bor Forbes’ning eng boy amerikaliklar ro‘yxatiga kiritilmagani, Mask dunyoning eng badavlat insoniga aylangach, Bezosga 2 raqami tushirilgan ulkan haykal va kumush medal yuborgani to‘g‘risida xabar berilgandi.
Izoh (0)