2020-yilning avgustida Bayrut portida sodir bo‘lgan portlashning tergovida Rossiyadan yordam so‘rash yoki so‘ramaslik borasidagi qarorni qabul qilish Livan sud organlarining qo‘lida. Bu haqda mamlakat bosh vaziri Najib Mikatiga tayanib, “Kommersant” xabar berdi.

“Agar sud hokimiyati tashqi tomondan qo‘shimcha ma’lumot so‘rashni ma’qul deb topsa, e’tirozimiz yo‘q. Barchamiz haqiqatning tagiga yetib, uni bilishni xohlaymiz”, — deya ta’kidlaydi u.

O‘tgan haftada Sochida bo‘lib o‘tgan “Valday” xalqaro klubi yig‘ilishida livanlik politolog Ragida Dergam Vladimir Putinga savol berib, Rossiya tergovga yordam berish uchun portdagi portlashning sun’iy yo‘ldoshdan olingan suratlarni taqdim etishga tayyormi, deya yuzlangandi. Shuningdek, u ushbu sud ishida “Hizbulloh”ning pozitsiyasini baholashni ham so‘ragan.

“To‘g‘risini aytsam, biror-bir kosmik suratlar qanday yordam berishini yaxshi tushunmayman, o‘zi u bizda bormi? Ammo sizga va’da beraman: albatta, men ‘spravka’larni yomon ko‘raman va ular bizda bo‘lsa va biz tergovga yordam ko‘rsatish imkoniyatida bo‘lsak, biz buni amalga oshiramiz. Men avval bu kabi ma’lumotlarga ega bo‘lishi mumkin bo‘lgan hamkasblarim bilan gaplashib olishim kerak”, — degan Vladimir Putin. Shuningdek, u “Hizbulloh”ni Livandagi “jiddiy siyosiy kuch” deb atagan.

Eslatib o‘tamiz, Livan poytaxti Bayrut shahridagi portda 2020-yilning 4-avgust kuni ammiak selitrasi saqlanayotgan ombor portlagandi. Portlash kuchi shu darajada bo‘ldiki, uning oqibatida butun shahardagi binolar zarar ko‘rdi, 190 kishi halok bo‘ldi, 300 mingdan ortiq odam uysiz qoldi. Mamlakat rasmiylari portlash oqibatida yuzaga kelgan umumiy zararni 3-5 milliard dollarga baholadi. Hodisa sababli mamlakat hukumati iste’foga chiqdi.