Тайванда мамлакат армиясини шуғуллантираётган америкалик ҳарбийлар бор. Бу ҳақда Тайван президенти Сзай Инвен CNN телеканалига берган интервьюсида айтиб ўтди.
Инвен журналистнинг саволига жавоб берар экан, Тайван ва АҚШ ўртасида «кенг кўламли ҳамкорлик» мавжудлигини тан олди. Унинг сўзларига кўра, бу ҳамкорлик аскарларни машқ қилдиришни ўз ичига олади, шунингдек, мамлакат мудофаасини оширишга қаратилган.
«(Тайвандаги АҚШ аскарлари) одамлар ўйлаганчалик кўп эмас», — дея қўшимча қилди Инвен. Тайван президенти, шунингдек, интервьюсида Хитойдан келаётган таҳдид «кун сайин ортиб бораётганини» айтди ва Пекиндан ҳужум содир этилган тақдирда, АҚШ ёрдамига ишонишини айтди.
Аввалроқ The Wall Street Journal АҚШ махсус операция кучлари ва Денгиз пиёдалари корпуси контингенти Тайванда маҳаллий қўшинларни махфий равишда ўқитаётгани ҳақида хабар берганди. Таъкидланишича, АҚШ махсус операция кучларининг 20 га яқин ходими Тайван қуруқлик қўшинларининг кичик гуруҳини шуғуллантирмоқда. Денгиз пиёдалари, ўз навбатида, маҳаллий денгиз флоти билан ишлаяпти. Нашр манбасининг аниқлик киритишича, АҚШ ҳарбийлари Тайванда камида бир йилдан буён бўлиб турибди.
АҚШ қўшинлари расмий равишда Тайванни 1979 йилда тарк этган, дея қайд этади CNN. 2020 йил ноябрь ойи бошида Тайван ҳарбий денгиз кучлари қўмондонлиги Тайван армияси аскарларини бир неча ҳафта давомида ўқитиш учун АҚШ ҳарбийлари келишини эълон қилган, бир неча кундан сўнг республика Мудофаа вазирлиги бу маълумотни рад этган. Taiwan News порталининг хабар беришича, Пентагон оролда АҚШ денгиз пиёдаларининг борлиги ҳақидаги маълумот «нотўғри» эканини айтган, бироқ айнан қайси маълумотлар хато узатилганини изоҳламаган.
Октябрь ойи бошида Тайван Мудофаа вазирлиги Хитой авиацияси томонидан мамлакат чегаралари рекорд даражада кўп кесиб ўтилгани ҳақида эълон қилди — 2 октябрь куни Хитойнинг 39 та ҳарбий самолёти Тайван ҳаво ҳудудига кирган. Ундан бир кун аввал Хитойнинг 38 та самолёти чегарани кесиб ўтганди. Хусусан, вазирлик 14 та тўртинчи авлод Ж-16 қирувчи самолёти, битта КЖ-500 олдиндан огоҳлантирувчи ва назорат қилувчи самолёти ва тўртта Су-30 самолётини қайд этган.
22 октябрь куни АҚШ президенти Жо Байден Хитойдан тажовуз содир бўлган тақдирда, Қўшма Штатлар Тайванни қўллаб-қувватлашга тайёрми, деган саволга тасдиқ жавобини берди. «Ҳа, биз шундай қилиш мажбуриятини олганмиз», — деди Байден. У АҚШ Хитой билан совуқ урушни хоҳламаслигини айтиб ўтди. Байден, шунингдек, Вашингтон тарихдаги энг кучли армияга эга эканини таъкидлади.
Хитой АҚШни Тайван билан барча расмий алоқаларни «зудлик билан тугатиш»га ва «ягона Хитой» тамойилига амал қилишга чақирди. «Дунёда фақат битта Хитой бор ва Хитой Халқ Республикаси ҳукумати бутун Хитойни ифодаловчи ягона қонуний ҳукуматдир», — деб таъкидлади ХХРнинг АҚШдаги элчихонаси.
Тайван ороли ва Хитой 1949 йилда фуқаролар уруши пайтида бўлинган. Пекин оролни Хитойнинг бир қисми деб билади, Вашингтон Хитойнинг орол устидан суверенитетини тан олади, аммо Тайваннинг мақоми барқарор эмас деб ҳисоблайди.
Изоҳ (0)