Vashington Xitoy bilan sovuq urushni xohlamaydi, biroq o‘z pozitsiyasidan ham chekinmaydi. Bu haqda AQSh prezidenti Jo Bayden Baltimor shahrida (Merilend shtati) jamoatchilik bilan o‘tkazilgan uchrashuvda ma’lum qildi, deb xabar beradi “TASS”.
Foto: EPA
“Men Si Szinpin bilan ko‘p gaplashdim va u bilan boshqa yetakchilarga qaraganda ko‘proq vaqt o‘tkazdim. Odamlarning Bayden Xitoy bilan yangi sovuq urushni boshlamoqchi, degan gaplarini eshitgansiz. Xitoy bilan sovuq urushni xohlamayman. Men Xitoy tushunishini istayman: biz ortga chekinmaymiz, biror qarashimizni o‘zgartirmaymiz”, — deydi AQSh prezidenti.
Oq uy rahbarining so‘zlariga ko‘ra, Rossiya, Xitoy va qolgan davlatlar AQSh eng yaxshi qurolli kuchlarga ega ekanini biladi. “Ular (AQShning raqiblari — tahr.) kuchayib ketishidan xavotirlanmang, ular jiddiy xatoga olib keladigan harakatni amalga oshirib qo‘yishi mumkinligidan xavotirlanish kerak.
Baydenning ta’kidlashicha, Tayvanga hujum xavfi tug‘ilgudek bo‘lsa, Vashington orolning xavfsizligini ta’minlashga tayyor. U “Xitoy hujum uyushtirsa, AQSh Tayvanni himoya qilishga tayyormi?”, degan savolga javob qaytargan: “Ha, buni amalga oshirish bo‘yicha majburiyatimiz bor”.
Avvalroq The Wall Street Journal AQSh maxsus operatsiya kuchlari va Dengiz piyodalari korpusi kontingenti Tayvanda mahalliy qo‘shinlarni maxfiy ravishda o‘qitayotgani haqida xabar bergandi. Ta’kidlanishicha, AQSh maxsus operatsiya kuchlarining 20 ga yaqin xodimi Tayvan quruqlik qo‘shinlarining kichik guruhini shug‘ullantirmoqda. Dengiz piyodalari, o‘z navbatida, mahalliy dengiz floti bilan ishlayapti. Nashr manbasining aniqlik kiritishicha, AQSh harbiylari Tayvanda kamida bir yildan buyon bo‘lib turibdi.
Ma’lumot uchun, 1949-yilda fuqarolar urushida mag‘lub bo‘lgan Chan Kayshi (1887—1975) rahbarligidagi Gomindana kuchlarining omon qolgan qismi Tayvanga qochgan va hudud o‘z administratsiyasi tomonidan boshqariladi. Tayvan shundan buyon o‘z bayrog‘i va kommunistlar boshqaruvga kelgunigacha alohida davlat bo‘lgan Xitoy Respublikasidan qolgan boshqa ramzlarini saqlab qolgan. Pekin orolni Xitoy provinsiyalaridan biri deb hisoblaydi.
AQSh Tayvan bilan 1979-yilda diplomatik munosabatlarni uzgan va uni Xitoy bilan o‘rnatgan. “Yagona Xitoy” siyosatini tan oluvchi Vashington, shu bilan birga, Taybey administratsiyasini qo‘llab-quvvatlashni va orolga qurollar yetkazishni davom ettirib kelmoqda.
