Шимолий Корея етакчиси Ким Чен Ин 20 килограммга яқин вазн йўқотди, бироқ Жанубий Корея разведкаси унинг соғлиғида ҳеч қандай муаммо йўқ деб ҳисобламоқда, дея хабар берди Yonhap агентлиги.
Агентлик маълумотларига кўра, ушбу хулоса разведка ходимлари томонидан Жанубий Корея парламенти аъзолари учун ўтказилган ёпиқ брифингда баён қилинган. Кимнинг аҳволига берилган баҳоларни тайёрлашда илғор технологиялар, жумладан, сунъий интеллектдан фойдаланилган.
Ким Чен Иннинг соғлиғи шу йил бошида у жуда озиб кетганидан кейин қизиқиш ва ташвишларга сабаб бўлди. Соғлиғи сабабли у ўз вазифаларини бажара олмаган тақдирда бунинг эҳтимолий сиёсий оқибатлари ҳақида баҳс-мунозаралар юзага келди.
Бир қатор таҳлилчиларнинг фикрича, «COVID-19 пандемияси, БМТнинг иқтисодий санкциялари ва табиий офатлар туфайли чуқурлашиб бораётган иқтисодий қийинчиликлар билан кураш кетаётган вазиятда аҳолининг қўллаб-қувватловини кучайтириш» мақсадида КХДРда етакчининг соғлиғига эътибор жалб қилинган.
Сеулдаги бошқа таҳлилчилар Ким Чен Ин шунчаки соғлиғини яхшилашга қарор қилганини, вазн йўқотиш учун парҳезга ўтганини истисно қилмаяпти.
Ким Чен Иннинг бўйи, тахминан, 170 см бўлиб, оғирлиги илгари 140 кг бўлган. Бироқ ҳозир у 20 кг вазн йўқотган.
Май июнь ойларида Ким Чен Ин қарийб бир ой давомида жамоатчиликка кўриниш бермаганди.
Сентябрь бошида Ким Чен Иннинг интернетда чоп этилган фото ва видеотасвирлари кенг муҳокама қилинган. Кадрлар Кимнинг соғлиғи ҳақида янги миш-мишларга сабаб бўлган. Шимолий Корея давлат оммавий ахборот воситалари томонидан эълон қилинган фотосуратда давлат раҳбарининг жуда озиб кетганини кўриш мумкин. Август бошида Ким Чен Иннинг бошидаги доғлар унинг соғлиғи ҳақида яна бир мунозарага сабаб бўлди.
Изоҳ (0)