Илон Маск Forbes рейтинги тарихидаги энг бой одамга айланди

Tesla акциялари қийматининг ўсиши туфайли Илон Маскнинг бойлиги маълум вақт давомида 300 миллиард долларга яқин бўлиб турди, бу эса уни Forbes рейтинглари тарихидаги энг бой одамга айлантирди.

25 октябрь, душанба куни бозорлар ёпилишида унинг жами активлари 271,3 миллиард долларни ташкил этди, бу 22 октябрь, жума кунги савдолар якунига нисбатан қарийб 41,7 миллиард долларга кўп.

Реал вақт режимида янгиланадиган Forbes Real Time рейтингида 26 октябрь куни Маскнинг бойлиги 254,9 миллиард долларга тушгани қайд этилган. Шунга қарамай, унинг бундан олдин эришган даражаси ҳали ҳам рекорд бўлиб қолмоқда. Аввал Forbes рейтинги тарихидаги энг бой одам Amazon асосчиси ва собиқ бош директори Жефф Безос бўлган эди. Amazon акциялари нархи июль ойида энг юқори чўққига чиққанида унинг бойлиги 212 миллиард долларга кўтарилган, ҳозир эса 196,5 миллиард долларга баҳоланмоқда.

Forbes талқини бўйича энг бой одамларнинг биринчи рейтинги 1918 йилда пайдо бўлган, ўшанда нашр 30 та энг бадавлат америкаликларнинг мол-мулкини баҳолаган. Ўшанда Жон Рокфеллер 1,2 миллиард долларлик бойлик билан етакчига айланган (инфляцияни ҳисобга олган ҳолда 2021 йилда бу миқдор 21 миллиард долларни ташкил этган бўларди).

1982 йилда журнал мунтазам равишда биринчи Forbes 400 (энг бой 400 америкалик рўйхати) билан рейтинглар тузишни бошлади. 1987 йилда сайёрамиздаги энг катта бойлик эгаларининг биринчи рўйхати (The World’s Billionaires) эълон қилинди. Ўша пайтда унга 20 миллиард долларлик бойлиги билан япониялик магнат Суцуми Ёсиаки (ҳозирги доллар курси бўйича тахминан 47 миллиард доллар) бошчилик қилган.

1997 йилдан 2008 йилгача дунёнинг энг бой одамлари рейтингида Microsoft асосчиси Билл Гейтс биринчи ўринда турган. Рейтингнинг энг юқори чўққисига чиққан пайтда унинг бойлиги 36,4 миллиард долларга баҳоланган (2021 йил курси бўйича тахминан 60 миллиард доллар). 2008 йилда, глобал молиявий инқироз бошланганидан сўнг, Гейтс учинчи ўринга тушиб кетди, инвестор Уоррен Баффет рейтинг етакчисига айланди (62 миллиард доллар ёки ҳозирги курс бўйича 77 миллиард доллар бойлик билан). 2009 йилда ва 2014 йилдан 2017 йилгача Билл Гейтс яна биринчи ўринни эгаллади. 2010—2013 йилларда у мексикалик магнат Карлос Слимдан ўзиб кетди. Forbes рейтингида етакчилик қилган вақтларда Слимнинг бойлигига берилган энг юқори баҳо — 2011 йилда 74 миллиард доллар (2021 йил курси бўйича 88 миллиард доллар) эди.

2018 йилда Amazon асосчиси Жефф Безос илк бор рейтингда биринчи ўринни эгаллади. У кейинги уч йил давомида ўз позициясини мустаҳкамлади. The World’s Billionaires’нинг  2021 йил учун классик рейтингида (йилига бир марта тузилади) унинг бойлиги 177 миллиард долларга баҳоланган.

Дунёдаги энг бой одамларнинг яна бир рейтинги Bloomberg агентлигининг ҳисоб-китобларига асосланади. Bloomberg Real Time Billionaires рўйхати ҳар куни янгиланади. 26 октябрь ҳолатига кўра, агентлик Илон Маскнинг бойлигини 289 миллиард долларга, Жефф Безосники эса 193 миллиард долларга баҳолаган.

Tesla акциялари янги ҳисоботлар эълон қилинганидан кейин кўтарила бошлади. 25 октябрда маълум вақт компаниянинг бозор капиталлашуви ҳатто 1 триллион долларлик чегарани ҳам бузишга муваффақ бўлди. Ушбу кўрсаткичга эришишга Hertz автоуловларни ижарага бериш сервиси учун 100 мингта электромобил етказиб бериш келишуви ҳақидаги хабарлар ёрдам берди.