Basketbolchi Maykl Jordonning Amerika Milliy basketbol assotsiatsiyasi chempionatlarida qatnashishi uchun maxsus yaratilgan eng birinchi Nike krossovkalari 24-oktabr kuni Las-Vegasda rekord darajadagi summa — 1,47 million dollarga sotildi. Bu haqda Sotheby’s auksion uyiga tayanib “Korrespondent.net” ma’lum qilgan.
Ma’lum qilinishicha, firma krossovkani mavsum boshlanishiga qadar bitirmagani hisobiga Jordan ushbu poyabzalni ilk bor 1984-yil Milliy basketbol assotsiatsiyasining beshinchi o‘yinida ishtirok etish uchun kiygan.
Sportchining oq-qizil krossovkasi haddan ortiq yorqin dizaynga ega ekani liga rahbariyatida norozilik uyg‘otgan. Har safar ushbu sport oyoq kiyimini kiyganida bir necha ming dollar jarimaga tortilgan. Shunga qaramay, Jordan ularni boshqasiga almashtirmagan. Natijada mazkur model Air Jordan nomini olgan.
Krossovkani sotuvga Tommi Tim qo‘ygan. Unga mazkur poyabzalni bolaligida, NBA o‘yinlarida to‘p yetkazib beruvchi sifatida faoliyat yuritgan vaqti Jordanning o‘zi bergan. Savdo avvalida lot 1—1,5 million dollarga baholangan. Poyabzalni kolleksioner Nik Fiorella qo‘lga kiritgan.
Ma’lumot uchun, Jordan ikki karra Olimpiya va 6 karra Milliy basketbol assotsiatsiyaning (Chikago tarkibida) chempioni sanaladi. 2003-yilda karyerasini tamomlagan sportchi 14 marta yulduzlar musobaqasida ishtirok etgan.
Avvalroq Maykl Jordanning imzosi tushirilgan Air Jordan 1 krossovkalari 1 million dollar qiymatida sotuvga qo‘yilgani haqida xabar berilgandi.
Izoh (0)