Britaniyada Garri Potter ismli 33 yoshli erkak Joan Rouling qalamiga mansub “Garri Potter va hikmatlar toshi” romanining birinchi nashriga oid kitobni 27,5 ming funtga sotdi. Bu haqda Hansons auksion uyiga tayanib, Esquire xabar berdi.
14-oktabr kuni kimligini oshkor etmagan britaniyalik xaridor kitobni 22 ming funtga sotib olgan, yana 5,5 ming funt auksion uyi uchun komissiya sifatida to‘langan.
Kitob chop etilgan vaqtda uning bir nusxasini Potterga otasi — Devid Jeyms Potter sovg‘a qilgan. “Otam Terri Vogan BBC Radio 2 orqali Garri Potterni tilga olganini eshitib qolgan va u boshlovchi o‘zining sakkiz yoshli o‘g‘lini emas, balki mukofotga loyiq ko‘rilgan bolalar kitobini nazarda tutayotganini anglagach, furgonini ortga burgan va kitob do‘konidan biz uchun bir nusxa xarid qilgan”, — deydi Garrining opasi Keti.
Oila uzoq vaqt davomida kitobni sotishni istamagan, ammo keyinroq qarindoshlar savdodan tushgan pullarni oila ehtiyojlari uchun ishlatishga qaror qilgan. Kitobni sotishdan tushgan pulni Potter va uning 36 yoshli opasi 2017-yilda vafot etgan marhum otasining xokini Keniyaga ko‘chirish uchun sarflaydi.
Garri Potter savdo menejeri bo‘lib ishlaydi. So‘nggi 25 yildan beri odamlarga bu o‘zining haqiqiy ismi ekanini tushuntirishga majbur bo‘lmoqda. “Ular shunchaki menga ishonmaydi. Bolalar futbol jamoasida o‘ynaganimda o‘zimni Garri Potter deb ataganim uchun hakam menga qizil kartochka bilan tahdid qilgandi. Rafiqam Filippani Gretsiyada dam olishda uchratib qolganman, u ham menga ishonmagan”, — deydi Potter.
Avvalroq Deniel Redkliff “Garri Potter”ning birorta qismi qayta suratga olinsa, qaysi personajni o‘ynashni xohlashini ma’lum qilgandi.
Izoh (0)