Баскетболчи Майкл Жордоннинг Америка Миллий баскетбол ассоциацияси чемпионатларида қатнашиши учун махсус яратилган энг биринчи Nike кроссовкалари 24 октябрь куни Лас-Вегасда рекорд даражадаги сумма — 1,47 миллион долларга сотилди. Бу ҳақда Sotheby’s аукцион уйига таяниб «Korrespondent.net» маълум қилган.
Маълум қилинишича, фирма кроссовкани мавсум бошланишига қадар битирмагани ҳисобига Жордан ушбу пойабзални илк бор 1984 йил Миллий баскетбол ассоциациясининг бешинчи ўйинида иштирок этиш учун кийган.
Спортчининг оқ-қизил кроссовкаси ҳаддан ортиқ ёрқин дизайнга эга экани лига раҳбариятида норозилик уйғотган. Ҳар сафар ушбу спорт оёқ кийимини кийганида бир неча минг доллар жаримага тортилган. Шунга қарамай, Жордан уларни бошқасига алмаштирмаган. Натижада мазкур модель Air Jordan номини олган.
Кроссовкани сотувга Томми Тим қўйган. Унга мазкур пойабзални болалигида, NBA ўйинларида тўп етказиб берувчи сифатида фаолият юритган вақти Жорданнинг ўзи берган. Савдо аввалида лот 1—1,5 миллион долларга баҳоланган. Пойабзални коллексионер Ник Фиорелла қўлга киритган.
Маълумот учун, Жордан икки карра Олимпия ва 6 карра Миллий баскетбол ассоциациянинг (Чикаго таркибида) чемпиони саналади. 2003 йилда карьерасини тамомлаган спортчи 14 марта юлдузлар мусобақасида иштирок этган.
Аввалроқ Майкл Жорданнинг имзоси туширилган Air Jordan 1 кроссовкалари 1 миллион доллар қийматида сотувга қўйилгани ҳақида хабар берилганди.
Изоҳ (0)