Dunyo va o‘zbek sportiga oid 18-oktabr kunining eng muhim xabarlari dayjesti bilan tanishing.
O‘zbekiston
Yosh sambochilar Jahon chempionatida ikkinchi o‘rinni egalladi
Sambo bo‘yicha O‘zbekiston yoshlar va o‘smirlar terma jamoasi 15—17-oktabr kunlari Gretsiyaning Saloniki shahrida bo‘lib o‘tgan Jahon chempionatida umumjamoa hisobida ikkinchi o‘rinni oldi. Birinchi pog‘onadan Rossiya terma jamoasi joy olgan bo‘lsa, kuchli uchlikka Ukraina vakillari yakun yasab berdi, deb yozmoqda Milliy olimpiya qo‘mitasi matbuot xizmati.
Shu tariqa o‘zbek sambochilari ilk marotaba Jahon chempionatida umumjamoa hisobida ikkinchi o‘rinni egalladi. Bungacha sambochilarning bunday Jahon chempionatidagi eng yaxshi natijasi uchinchi pog‘ona bo‘lgandi.
Terma jamoa jahon birinchiligi yakuniga ko‘ra 6 ta oltin, 3 ta kumush va 8 ta bronza, umumiy hisobda 17 ta medal qo‘lga kiritdi.
Buxoroda boks bo‘yicha yoshlar o‘rtasida O‘zbekiston chempionati o‘tkazildi
Buxoro shahrida 10—16-oktabr kunlari boks bo‘yicha yoshlar o‘rtasida O‘zbekiston chempionati o‘tkazildi. Musobaqada mamlakatning barcha hududlaridan jami 362 nafar bokschi sovrinli o‘rinlar uchun kurash olib bordi.
Musobaqada umumjamoa hisobida mezbon Buxoro viloyati vakillari 1-o‘rinni egalladi. Ular 4 ta oltin, 2 tadan kumush va bronza medalga sazovor bo‘ldi. Keyingi o‘rinlarni Andijon va Qoraqalpog‘iston Respublikasi terma jamoalari egalladi.
U-23 Osiyo chempionati saralashi doirasidagi o‘yinlar Toshkentda o‘tkaziladi
23 yoshgacha bo‘lgan futbolchilar o‘rtasidagi Osiyo chempionati saralash bosqichi doirasidagi D guruhi o‘yinlari Toshkentda o‘tkazilishi ma’lum bo‘ldi.
Kuvayt futbol assotsiatsiyasi saralash bosqichi doirasidagi o‘yinlarni qabul qilishni rad etgach, ushbu o‘yinlar Toshkentda o‘tkaziladigan bo‘lgan, dastlabki o‘yinlar 27-oktabr kuni bo‘lib o‘tadi.
Ma’lumot uchun, D guruhidan Saudiya Arabistoni, Bangladesh va O‘zbekiston o‘rin olgan.
Jahon
“Nyukasl”ni boshqarishga asosiy nomzodlar aniqlandi
Saudiya Arabistoni fondi tomonidan sotib olingan “Nyukasl” yangi bosh murabbiy qidirishda davom etmoqda.
The Times nashrining yozishicha, ushbu lavozimga asosiy nomzod sifatida “Reynjers”ni boshqarib borayotgan Stiven Jerrard, Belgiya terma jamoasi bosh murabbiyi Roberto Martines va “Vilyarreal” ustozi Unai Emeri ko‘rilmoqda.
Qayd etilishicha, klub rahbariyati ushbu haftada yangi murabbiy masalasida ish olib boradi.
Neymar va yana jamoaning ikki yetakchisi “PSJ”ning “Leypsig”ga qarshi o‘yinini o‘tkazib yuboradi
“PSJ” futbolchilari Neymar, Leandro Paredes va Serxio Ramos jarohatlar tufayli jamoaning yaqin oradagi o‘yinlarini o‘tkazib yuboradi.
Klub matbuot xizmatining ma’lum qilishicha, Neymar Braziliya terma jamoasi yig‘inidan son mushaklaridagi og‘riq bilan qaytgan. Uning tiklanishiga bir necha kun ketadi va futbolchi Chempionlar Ligasi doirasidagi “Leypsig”ga qarshi bahsni o‘tkazib yuboradi. Shuningdek, argentinalik Paredes ham terma jamoa safida jarohat olgan, “PSJ”da hali debyut qilmagan Ramos esa hamon jarohatidan tiklanish jarayonini boshdan kechirmoqda.
“PSJ” — “Leypsig” uchrashuvi 19-oktabrdan 20-oktabrga o‘tar kechasi soat 00:00 da boshlanadi.
“PSJ” Serxio Agueroga qiziqmoqda
“PSJ” “Barselona” hujumchisi Serxio Agueroni sotib olmoqchi.
El Nacional’ga ko‘ra, Parij klubi 33 yoshli argentinalik uchun Mauro Ikardini taklif qilishga tayyorligini ma’lum qilgan. Biroq manba “Barselona”ning bu kelishuvga qiziqish bildirmayotganini qo‘shimcha qilgan.
Qayd etish kerak, Aguero yozda Lionel Messi bilan birga to‘p surish uchun “Barselona”ga o‘tgandi, biroq Messi “PSJ”ga yo‘l oldi. Agar Serxio Parij klubiga o‘tsa, yana Messi bilan bir jamoada to‘p surish imkoniyatiga ega bo‘ladi.
De Bryuyne “Oltin to‘p”ni Levandovskiga berishni taklif qildi
“Manchester Siti” yarim himoyachisi Kevin de Bryuyne “Oltin to‘p”ni kim olishi kerakligi haqida o‘z fikrlari bilan o‘rtoqlashdi.
“Agar tanlashim kerak bo‘lsa, oxirgi ikki yilga qarab qaror qabul qilardim.
Robert Levandovskini tanlagan bo‘lardim, chunki u ‘Bavariya’ safida juda ko‘p gol urdi va qator sovrinlarni qo‘lga kiritdi”, — deydi de Bryuyne.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)