АҚШ суди миллионер ва кўчмас мулк соҳиби Роберт Дёрстни 21 йил аввалги қотиллик учун умрбод қамоқ жазосига ҳукм қилди. Бу ҳақда CNN хабар берди.
Сентябрь ойининг бошида суд ҳайъати 78 ёшли Дёрстни жиноят содир этганликда айбдор деб топганди.
Калифорния қонунига кўра, муайян ҳолатларда қотиллик қилганлар ўлим ёки умрбод қамоқ жазосига ҳукм қилиниши мумкин. Лос-Анжелес прокуратураси Дёрстнинг қатл этилишини талаб қилмаган, чунки штат ўлим жазосига мораторий киритган, дея қайд этади CNN.
2020 йил декабрь ойида Forbes журнали Дёрст оиласининг бойлигини 8,1 миллиард долларга баҳолаган. 2006 йилда Роберт Дёрст оилавий бизнесдаги ўз улушини қариндошларига 65 миллион долларга сотган. Шу тариқа Дёрстлар оиласи АҚШнинг энг бой оилалари рўйхатида 47-ўринни эгаллаган.
2015 йил март ойида Дёрст яқин дўсти Сюзан Берманни ўлдирганликда гумон қилиниб, ҳибсга олинганди, аёл 2000 йилда ўз уйида бошидан ўқ еган ҳолатда топилган. Аёл полиция билан Дёрстнинг рафиқаси Кетлиннинг ғойиб бўлиши масаласида гаплашишни режалаштирганидан кўп ўтмай ўлдирилган. 1982 йилда миллионернинг рафиқаси сирли равишда ғойиб бўлган, кейинчалик унинг вафот этгани эълон қилинди.
Берманнинг ўлдириб кетилиши ҳақидаги жиноят иши Дёрстнинг ҳаётига бағишланган «Лаънат» (The Jinx) ҳужжатли сериал суратга олинганидан кейин очилди. Журналист билан бўлган суҳбатдан кейин миллионер ҳожатхонага кириб, ўз-ўзи билан гаплаша бошлаган — бу вақтда унинг микрофони ўчирилмаган бўлган. «Жин урсин, ўзи мен нима қилдим? Уларнинг ҳаммасини ўлдирдим, албатта», — деган у шу жумладан. Суратга олиш гуруҳи ушбу аудиоёзувни ҳамда сериал устида ишлаш чоғида тўпланган бошқа далилларни полицияга олиб борган.
2001 йилда Дёрст ўзи билан қўшни бўлиб яшаган одамни ўлдирган. Ушбу қотиллик учун у судланган, аммо суд маслаҳатчилари уни ўзини ўзи мудофаа қилиш зарурати доирасида ҳаракат қилган, деб топган.
Изоҳ (0)