Turkiya sudi to‘rt kishini 2016-yil 12 nafar germaniyalik sayyohlarning o‘limiga sabab bo‘lgan Istanbuldagi teraktlarda aybdor deb topdi va ularni bir umrlik qamoq jazosiga hukm qildi. Bu haqda Hurriyet Daily News xabar berdi.

Foto: EPA

Fuqaroligiga aniqlik kiritilmagan to‘rt nafar erkak bir umrga ozodlikdan mahrum qilindi. Boshqa 18 nafar gumondor esa bu ish bo‘yicha oqlandi.

2016-yilning yanvar oyida shaharning sayyohlar eng ko‘p tashrif buyuradigan diqqatga sazovor joylaridan bo‘lgan Moviy masjid va Aya Sofiya yonidagi Sulton Ahmad maydonida portlash sodir bo‘lgan edi.

O‘shanda Turkiya hukumati terakt uchun javobgarlikni IShID zimmasiga yuklagan bo‘lsada, jangarilar voqeaga aloqadorligi masalasida hech narsa demagan.

Ma’lumot uchun, 2016-yilning 12-yanvar kuni tongda Istanbul markazida joylashgan Sulton Ahmad maydonidagi bir guruh sayyohlar bo‘lgan avtobus bekatiga yaqin joyda portlash sodir etilgan edi. Keyinroq xabar berilishicha, Turkiya OAVlariga bu haqda yozish taqiqlangan. Shuningdek, gid turistlarning bir qismini qutqarib qolgani ma’lum qilingan.

Avvalroq Mozambikning shimoli-sharqida joylashgan Palma shahriga qurollangan jangarilar hujum qilgani haqida xabar berildi. Eng kamida 57 kishi halok bo‘ldi, ular orasida chet el fuqarolari ham borligi aytilmoqda.

Shuningdek, Malining shimolida jangarilar harbiy bazalardan biriga hujum qildi. Oqibatda 33 nafar harbiy halok bo‘lgani haqida ma’lumot berildi. Mamlakat Mudofaa vazirligining ma’lumotlariga ko‘ra, 15-mart kuni Ansango tumanidan 60 kilometr uzoqlikda joylashgan Tessit aholi punktidagi harbiy qismga qurollangan terrorchilar hujum qilgan.

Indoneziyaning Sulavesi orolidagi Makasar shahrida esa ikki nafar xudkush katolik cherkovi darvozasi yonida portlash uyushtirdi. Politsiya ma’lumotlariga ko‘ra, 14 kishi jabrlangan. Hozircha voqea yuzasidan hech kim javobgarlikni o‘z zimmasiga olmagan.